ఇతర బ్రౌజర్లకు నెటిజన్లని మార్చే బాధ్యత తీసుకుందాం

చర్వితచరణంగా Internet Explorerలో మళ్లీ మరో కీలకమైన సెక్యూరిటీ లోపం బయటపడింది.  మొత్తానికి ఈనాడు వంటి దినపత్రికలు ఈసారి ఈ సమస్య ప్రాధాన్యతను గుర్తించి నెట్ వాడకందారులను చైతన్యపరిచేలా వార్తలు రాయడం శుభపరిణామం. IEకి ప్రత్యామ్నాయంగా కొన్నేళ్లపాటు Opera చలామణి అయిన విషయం విదితమే. ఇప్పటికీ Opera స్థాయి ఏమాత్రం తగ్గలేదు. అయితే IE స్థానాన్ని బలంగా కదిలించగలగడంలో Mozilla Firefox కీలకపాత్ర పోషించింది.  బ్రౌజర్ సెక్యూరిటీపై కొద్దిపాటి అవగాహన ఉన్నవారు ఎవరైనా ఇప్పుడు IE జోలికే వెళ్లడం లేదు. కారణం ActiveX controls, BHO’s (browser hijackers) వంటి అంశాలతో పాటు ఇతర అనేక సెక్యూరిటీ లోపాలు ఇంటర్నెట్ కి కనెక్ట్ అవాలంటేనే భయపడేలా పిసి వాడకందారులను భయపెట్టేశాయి. ఇప్పటికీ అధికశాతం మంది IEని వాడుతూనే ఉన్నారు.

దీనికి కొన్ని కారణాలు:

• Windowsతో పాటు డీఫాల్ట్ గా IE రావడం. అస్సలు web browser యొక్క ప్రాధాన్యత చాలామందికి తెలియకపోవడం. మరీ ముఖ్యంగా windowsతో పాటు వచ్చినదే ప్రామాణికం అన్న భ్రమలో చాలామంది ఉండడం. Firefox, Opera, Chrome, Safari వంటి అనేక ప్రత్యామ్నాయ బ్రౌజర్లు ఉన్నాయని తెలియకపోవడం.

• ఇప్పుడు స్వంతంగా నెట్ కనెక్షన్ కలిగి ఉన్న ప్రతీ ఒక్కరూ మొదట్లో బయట నెట్ సెంటర్లలో నెట్ బ్రౌజ్ చేసినవారే. నెట్ సెంటర్లలో నేను 1996 నుండి గమనిస్తున్నాను. అప్పట్లోనే IEకి ప్రత్యామ్నాయాలు ఉన్నప్పటికీ అప్పటి నుండి ఇప్పటివరకూ అధికశాతం నెట్ సెంటర్లు IEనే వాడుతున్నాయి. కారణం ఒక్కటే.. “వేరే దానికి మారితే మా సెంటర్ కి వచ్చే కస్టమర్ కి కొత్తగా ఉంటుంది” అని “కంప్యూటర్ ఎరా” పాఠకులైన అనేక నెట్ సెంటర్ల నిర్వాహకులు చెబుతుంటారు నేరుగా కలిసినప్పుడు గానీ,  ఫోన్లలో వారి సందేహాలు తీర్చుకునేటప్పుడు గానీ! అంటే మార్పుని కస్టమర్ల ఆహ్వానించలేరనే ఉద్దేశంతో IEతోనే నెట్టుకువస్తున్నారన్నమాట.

• మన నోళ్లలో ఎక్కువ నానేది ఏదైనా బాగా ప్రాచుర్యం సంతరించుకుంటుదన్నది విదితమే. సహజంగా మనం వెబ్ బ్రౌజర్ ప్రస్తావన వచ్చినప్పుడు “IEలోకెళ్లి ఆ సెట్టింగ్ చేయండి”, “IE అడ్రస్ బార్ లో google.com అని కొట్టండి” ఇలా గైడ్ లైన్స్ ఇస్తూ ఇంటర్నెట్ బ్రౌజర్ అంటే Internet Explorer పేరే స్ఫురించేలా ప్రవర్తిస్తుంటాం. ఇది కొత్తగా కంప్యూటర్ నేర్చుకునేవారికీ, నెట్ వాడేవారి మీదా ఎంతో ప్రభావాన్ని చూపిస్తుంది. ఇలా చెప్పుకుంటూ పోతే IEతోనే జనాలు సతమతం అవడానికి ప్రత్యక్షంగానూ, పరోక్షంగానూ అనేక అంశాలు కారణం అవుతూ ఉంటాయి.

మనమేం చెయ్యగలం:

అవగాహన కలిగిన వ్యక్తి తనకు వీలైనంత మేర మరొకరిని ఎడ్యుకేట్ చేసే బాధ్యతని స్వీకరించడం బాధ్యతగా ఫీల్ కావాలి. మనలో చాలామంది IEని వదిలేసి Firefox, Opera, Chrome వంటి ప్రత్యామ్నాయ బ్రౌజర్లని వాడుతున్నాం. అదీ గాక బ్లాగర్లుగా మనకొక platform ఉంది. బ్రౌజర్ అంటే IEనే అని భావించే బేసిక్ కంప్యూటర్ నాలెడ్జ్ ఉన్న పిసి యూజర్లు ఎందరో మన బ్లాగుల్ని సందర్శిస్తుంటారు. అలాంటి వారిలో ఆలోచన రేకెత్తేలా “IEకి బదులుగా Firefox, Opera, Chrome వంటి బ్రౌజర్లు సురక్షితమైనవి అవి వాడండి” అని సైడ్ బార్ లోనో, మరో చోటో చిన్న మెసేజ్ మనం పెట్టవచ్చు.

నేనేం చేశానంటే:

గత ఆరు నెలలుగా http://computerera.co.in/forum “కంప్యూటర్ ఎరా” ఫోరంలో ఓ చిన్న ఏర్పాటు చేశాను. ఆ ఫోరంలో ఇప్పటివరకూ 6,552 మంది రిజిస్టర్డ్ సభ్యులు, 9,567 వరకూ పోస్టులూ ఉన్నాయి. ఫోరంని సందర్శించే వారి OS, browser, IPలు వగైరా సమాచారం track చెయ్యడానికి Woopra అనే ఓ శక్తివంతమైన సర్వీస్ ని మా VBulletin ఫోరం scriptతో integrate చేయడం జరిగింది. దాని నివేదికల ప్రకారం మొదట్లో IE6 వాడేవారు 42% వరకూ, IE7 వాడేవారు 25% వరకూ, Firefox వాడేవారు 20% వరకూ, Opera వంటి ఇతర బ్రౌజర్లు వాడేవారు 13% వరకూ ఉండేవారు.  దీన్ని దృష్టిలో ఉంచుకుని ఎవరైనా కంప్యూటర్ ఎరా ఫోరంని IE ద్వారా యాక్సెస్ చెయ్యడానికి ప్రయత్నిస్తే పై భాగంలో సీరియస్ వార్నింగ్ చూపించబడేలా ఓ రెండు లైన్ల html కోడ్ ని header scriptలో జతచేయడం జరిగింది. అప్పటి నుండి నిశితంగా గమనిస్తూ వస్తున్నాను. IE వాడేవారు ఫోరంలోకి ప్రవేశించిన వెంటనే పైన కన్పించే వార్నింగ్ వద్ద firefox లింకుని క్లిక్ చేసి ఆ సైట్ కి వెళ్తున్నట్లు outclicks నమోదు అవుతున్నాయి. ఇప్పుడు 6,552 సభ్యులన్న కంప్యూటర్ ఎరా ఫోరంలో 72% మంది Firefoxని వాడుతున్నారు. IE6ని వాడేవారు 10%, IE7 వాడేవారు 13%, ఇతర బ్రౌజర్లు వాడేవారు 5%.

ఇక్కడ చివరిగా ఒక్క విషయం నేను Internet Explorer ద్వేషిని కాదు. ఒక తెలుగు కంప్యూటర్ మేగజైన్ ఎడిటర్ గా ప్రతీ పిసి యూజర్ సెక్యూరిటీ పరంగా సురక్షితంగా ఉండాలని కోరుకుంటాను. సెక్యూరిటీ పరంగా Firefox, Opera వంటి ప్రత్యామ్నాయాల కన్నా IE మెరుగ్గా ఉంటే ఇప్పటికిప్పుడు IEకి వత్తాసు పలకడానికి నేను వెనుకాడను. మన బ్లాగు మిత్రులను కోరేది మనకంటూ బ్లాగులు ఉన్నాయి, సందర్శకులు వస్తుంటారు, వారు కనీసం ఆలోచించేలా firefox వంటి ఇతర బ్రౌజర్లు వాడమని చెప్పగలిగే బాధ్యతని చిన్న మెసేజ్ మన బ్లాగు సైడ్ బార్ లో పెట్టడం ద్వారా చేద్దాం. ఇప్పుడు ఈ బ్లాగుకి వాడుతున్నది కస్టమ్ wordpress టెంప్లేట్. ఇప్పటికిప్పుడు నేను దీనిలో ఆ మెసేజ్ పెట్టలేకున్నాను, ఫోరంలో ఎటూ గత కొన్ని నెలలుగా ఏర్పాటు చేశాను. మీరు బ్లాగర్ లో add element ద్వారా text మెసేజ్ ని సైడ్ బార్ లో జతచెయ్యవచ్చు.