E-తెలుగు, కంప్యూటర్ ఎరా సంయుక్త సమావేశం జూలై 2008 నివేదిక

సమయం: 13, జూలై, 2008, మధ్యాహ్నం 3 గంటలు
వేదిక: కృష్ణకాంత్ ఉద్యానవనం, యూసఫ్ గూడ బస్తీ దగ్గర, హైదరాబాద్.
హాజరైన సభ్యులు
1. కృష్ణకుమార్
2. శ్రవణ్ కుమార్
3. సిహెచ్. రామ్ కుమార్
4. నల్లమోతు శ్రీధర్
5. జి. శ్రీనివాస్
6. ఎన్. విక్రమ్
7. కె.జె. సత్యసాయిరాం
8. జి. ఛాయాదేవి
9. బి. ప్రసన్న కుమారి
10. పి. కశ్యప్
11. సి. భాస్కరరావు
12. దూర్వాసుల పద్మనాభం
13. తుమ్మల శిరీష్ కుమార్
14. గబ్బిట సుబ్రహ్మణ్య విఠల్
15. సి. ఫణిరామ దీక్షితులు
16. వీవెన్
17. కొత్తపల్లి సీతారాం
18. నువ్వుశెట్టి కృష్ణకిషోర్
19. కట్టా విజయ్
20. శ్రీధర్ పతి

ఎడమ నుండి కుడికి వరుసగా: సిబిరావు, కశ్యప్, ప్రసన్నకుమారి, ఛాయాదేవి, సత్యసాయిరాం, విక్రమ్, శ్రీనివాస్

సభ్యుల పరిచయాలు పూర్తయిన తర్వాత కొత్త పల్లి సీతారాం గారు తెలుగు భాష నానాటికీ ఎంతగా ఉనికిని కోల్పోతోందో కొన్ని అంశాలను ఉటంకిస్తూ భాష గాలి లాంటిదని దానికి ఆయువు లాంటి మన సంస్కృతీ సంప్రదాయాలను కాపాడుకోవడం ద్వారా భాషని స్థిరంగా నిలబెట్టుకోగలమని విశ్లేషిస్తూ.. తను స్వయంగా పరిశోధించి కనుగొన్న సరికొత్త ఏనిమేషన్ టెక్నాలజీ సహకారంతో వేమన పద్యాలు, దసరా పద్యాలు వంటి సాంస్కృతిక సంపదకు దృశ్యరూపం కల్పించినట్లు వెల్లడించారు. ఈ సందర్భంగా తెలుగు భాషని కాపాడడంలో ప్రభుత్వం, ఇతర భాషా పరిరక్షణా ఉద్యమాల పాత్ర కొంతసేపు చర్చనీయాంశం అయింది. అలాగే ఇంగ్లీషు మాధ్యమంలో విద్యాబోధనకు ప్రభుత్వం పూర్తిస్థాయి సుముఖత వ్యక్తం చేస్తూ ఇటీవల తీసుకున్న నిర్ణయాలు వగైరా ప్రస్తావించబడ్డాయి. చదువరి గారు, సిబి రావు గారు. కశ్యప్ గారు పద్మనాభం గారు తదితరులు సమస్య యొక్క పార్శ్యాలను విభిన్న కోణాల్లో చర్చించారు. అలాగే ఈ సమావేశానికి దూర్వాసుల పద్మనాభం గారు విఠల్ గారి కుటుంబ సభ్యులను, కొత్తపల్లి సీతారాం గారిని ఆహ్వానించడం ద్వారా మన ఉద్యమాన్ని మరికొందరు భాషాభిమానులకు పరిచయం చేశారు. సమావేశానికి హాజరైన కంప్యూటర్ ఎరా పాఠకులను తెలుగులో బ్లాగులు ప్రారంభించమని సిబి రావు గారు, పద్మనాభం గారు కోరారు. చదువరి గారు e-తెలుగు “సంస్థ” హోదా చేరక మునుపు ఏ స్థాయిలో కార్యకలాపాలను నిర్వహించబడ్డాయో అదే స్థాయిలో కార్యకలాపాలు సాగుతున్నట్లు తెలియజేశారు. e-తెలుగు చేపడుతున్న స్థానికీకరణ వంటి పనులకు మరింత మంది ఔత్సాహికులు స్వచ్చంధంగా తమ సహకారం అందిస్తే పనులు వేగవంతం అవుతాయని పేర్కొన్నారు.

ఎడమ నుండి కుడికి వరుసగా: విక్రమ్, శ్రీనివాస్, నల్లమోతు శ్రీధర్, రామ్ కుమార్, శ్రవణ్ కుమార్

విభిన్న శైలిల్లో యూనీకోడ్ ఫాంట్ల రూపకల్పన విషయమై వీవెన్ ప్రస్తావిస్తూ.. సి-డాక్ వారు విడుదల చేసిన ఫాంట్లలో ఆకృతుల విషయంలో కొన్ని లోపాలు ఉన్నాయని వాటిని సరిచెయ్యడానికి ఫాంట్ మాపింగ్ పై అవగాహన ఉన్న నిపుణుల సహకారం అవసరం అని తెలిపారు. వివిధ సాఫ్ట్ వేర్ ఉపకరణాల స్థానికీకరణ విషయం ప్రస్తావిస్తూ.. వర్డ్ ప్రెస్ తెలుగీకరణ 66% పూర్తయిందని, వికీపీడియా సాఫ్ట్ వేర్, ఉబుంటు స్థానికీకరణ పనులు జరుగుతున్నట్లు వీవెన్ వెల్లడించారు. ఇలా పలు విషయాలు చర్చిస్తుండగా జాన్ హైడ్ కనుమూరి గారు రావడం ఆయన ఇటీవల విడుదల చేసిన “అమ్మ సంకలనం” గురించి అందరూ అభినందించడం జరిగింది. ఈ నేపధ్యంలో త్వరలో తాను “గ్రంధాలయాల సంకలనం” పేరిట మరో సరికొత్త ప్రాజెక్ట్ ని విడుదల చేయబోతున్నట్లు ఆయన వెల్లడించారు.

ఎడమ నుండి కుడికి వరుసగా: రామదీక్షితులు, విఠల్, తుమ్మల శిరీష్ కుమార్, దూర్వాసుల పద్మనాభం, కొత్తపల్లి సీతారాం, సిబిరావు

తమ సాంకేతిక పరిజ్ఞానాన్ని పంచుకోవడానికి “కంప్యూటర్ ఎరా” చేపట్టిన సాంకేతిక సహాయం ఛాట్ రూమ్, ఫోరంల విషయమై.. సభ్యుల భాగస్వామ్యం మరింత పెంపొందించాలంటే ఓపెన్ గా ఉన్న సందేహాలు లాగిన్ పేజీలో ఆటోమేటిక్ గా వచ్చేలా ఏర్పాటు చేస్తే బాగుంటుందని కశ్యప్ గారు సూచించారు. గ్రామీణ, పట్టణ ప్రాంతాల నుండి హైదరాబాద్ కి కెరీర్ దృష్ట్యా వస్తున్న యువతకు కెరీర్ గైడెన్స్ ఇచ్చేలా చిన్న చిన్న సెమినార్లు నిర్వహిస్తే ఎలా ఉంటుంది అన్న ఆలోచనకు చదువరి గారు ప్రత్యక్షంగానే కాకుండా ఫోరంలో కూడా తగిన సమాచారం అందిస్తే బాగుంటుంది అని సూచించారు. కంప్యూటర్ ఎరా ఛాట్, ఫోరంలకు బొత్తాం తయారు చేస్తే వీలైన వారందరూ తమ బ్లాగుల్లో పెడతారని కట్టా విజయ్ గారు సూచించారు.
చివరిగా యధావిధిగా క్యాంటీన్ కి వెళ్లి తేనీరు సేవించి ఒకరికొకరు వీడ్కోలు చెప్పుకుంటూ ఇంటి దారి పట్టాం.

ఫైర్‌ఫాక్స్‌లోనే IE స్వరూపం ఒక టాబ్‌లో!

ఫైర్‌ఫాక్స్ బ్రౌజర్‌కి అలవాటు పడిన తర్వాత దాని కోసం ప్రత్యేకంగా లభిస్తున్న వివిధ add-onలను రుచి చూసిన తర్వాత సహజంగా ఎవరూ ఇక ఇంటర్నెట్ ఎక్స్‌ప్లొరర్ జోలికి వెళ్ళరు.  అయితే ఒక్కోసారి వెబ్ డెవలపర్లు తాము రూపొందించే వెబ్ పేజీలు IEలో ఎలా డిస్‌ప్లే అవుతాయో ప్రివ్యూ చూసుకోవలసి వస్తుంటుంది.  అలాంటప్పుడు మళ్ళీ ప్రత్యేకంగా IE ఓపెన్ చెయవలసిన అవసరం లేకుండా ప్రస్తుతం తాము ఉన్న ఫైర్‌ఫాక్స్ విండోలోనే IE  tab రూపంలో ఓపెన్ అయ్యే  వీలు కల్పిస్తుంది. తాత్కాలికంగా ఇంటర్నెట్ ఎక్స్‌ప్లోరర్‌ని యాక్సెస్ చేయాలనుకునే వారికి ఇది ఉపయోగపడుతుంది.

షేర్ మార్కెట్ వ్యాపారం చేస్తున్నారా.. ఇది వాడండి

మీరు షేర్  వ్యాపారం  చేస్తున్నారా? .. అయితే ముంబాయి స్టాక్ ఎక్స్చేంజ్‌లో సెన్సెక్స్, ఇతర quotes యొక్క వివరాలాను ఎప్పటికప్పుడు మీ ఫైర్‌ఫాక్స్ బ్రౌజర్‌లోనే తెలుసుకునే అవకాశాన్ని ఫైర్‌ఫాక్స్ కోసం ప్రత్యేకంగా రూపొందించబడిన India Stock Market and Sensex Watcher అనే add-on కల్పిస్తోంది. ఫైర్‌ఫాక్స్ స్టేటస్ బార్‌పై ఈ వివరాలను చూపిస్తుంది.

మీ మూడ్‍లు మారాలంటే ఇదే పరిష్కారం…

పెద్ద అపజయం ఎదురైంది. లేదా మీ కుటుంబ సభ్యులతో మాటల యుద్ధం జరిగి మనసు వికలమైంది. ఏం చేస్తారు.?? మళ్ళీ మళ్ళీ అదే ఆలోచిస్తూ కుంగిపోతుంటారు. అలాంటి సందర్భాల్లో మన ఆలోచనసరళిని కొద్దిసేపు వేరే టాపిక్‌పై మళ్ళించే అవకాశముంటే బాగుంటుంది కదూ! అప్పుడు mood swings అనే వెబ్‌సైట్‌ని బ్రౌజ్ చేయండి. అందులో I feel అనే డ్రాప్‌డౌన్ లిస్ట్ వద్ద ప్రస్తుతం మీ మూడ్ ఎలా ఉందో ఎంపిక చేసుకుని Take me away అనే బటన్‌ని క్లిక్ చేయండి. వెంటనే ప్రస్తుతం మీరున్న మూడ్ నుండి పాజిటివ్‌గా దృష్టిని మళ్ళించే వెబ్‌సైట్ ఏదో ఒకటి ఓపెన్ అవుతుంది.అందులో ఉన్న సమాచారాన్ని తీరిగ్గా చదువుతూ పోతే ప్రస్తుతం మిమ్మల్ని ఇబ్బంది పెడుతున్న భావావేశం నుండీ విముక్తి పొందుతారు.

సాంకేతికాలు జన్మదినం నేడు..

జూలై 9, 2007న “నల్లమోతు శ్రీధర్ సాంకేతికాలు” బ్లాగుని ప్రారంభించడం జరిగింది. నేటితో సాంకేతికాలు బ్లాగుకి ఏడాది పూర్తయింది. ఈ ఏడాది కాలంలో 440 పోస్టులతో 30వేల విజిటర్స్ తో బ్లాగు మిత్రుల ఆదరాభిమానాలతో, చక్కని కామెంట్లతో విజయప్రస్థానం సాగించింది. మొదట్లో blogspotలో హోస్ట్ చెయ్యబడిన బ్లాగు http://computerera.co.in/ అనే స్వంత డొమైన్ ని సమకూర్చుకున్న తర్వాత స్వంత గూటికి మారిన విషయం తెలిసిందే. మొదటి నుండి జ్యోతక్క సాంకేతికాలు బ్లాగుని తన స్వంత బ్లాగులా కంటికి రెప్పలా నిర్వహిస్తూ వస్తున్నారు. నేను మేగజైన్ బిజీలో ఉన్నప్పుడు నేను అందజేసిన కంటెంట్ ని రెగ్యులర్ గా పోస్టుల రూపంలో పోస్ట్ చేస్తూ ఒక డైనమిక్ బ్లాగ్ గా దీన్ని తీర్చిదిద్దడంలో తన పాత్ర ఎంతో కీలకమైనది. ఇటీవలి కాలంలో సాంకేతిక సహాయం మరియు కంప్యూటర్ ఎరా ఫోరం నిర్వహణలోనూ, “కంప్యూటర్ ఎరా” మాసపత్రిక ప్రిపరేషన్ లోనూ నేను పూర్తిగా నిమగ్నమై ఉన్నా కంప్యూటర్ ఎరా మేగజైన్ లో గతంలో ప్రస్తావించిన అనేక చిట్కాలను బ్లాగు పోస్టులు చేస్తూ జ్యోతక్క ఈ సాంకేతికాలు బ్లాగుని నిరంతరం సజీవంగా నిలబెడుతోంది. తన రుణం ఏ విధంగానూ తీర్చుకోలేనిది. నిజంగా యాధృచ్చికంగా తెలుగు బ్లాగు ప్రపంచంలోకి అడుగుపెట్టిన మాలాంటి వారికి తను ఎంత అండగా నిలుస్తారో  చాలామందికి తెలిసిందే!

“నల్లమోతు శ్రీధర్ సాంకేతికాలు” బ్లాగు పుణ్యమా అంతర్జాలంలోకి అడుగపెట్టిన తర్వాత ఈ ఏడాది కాలంలో ఎన్నో మార్పులు చోటుచేసుకున్నాయి. వేర్వేరు ప్రాంతాల్లో ఉన్న కంప్యూటర్ ఎరా పాఠకులు నిరంతరం టచ్ లో ఉండడం వల్ల టెక్నికల్ నాలెడ్జ్ ని ఆంధ్రరాష్ట్రమంతటా మనకు వీలైనంత మేర వ్యాపింపజేసే లక్ష్యంలో ఏదైనా ప్రాజెక్ట్ చేపడితే బాగుంటుంది, అందరి నా లెడ్జ్ అందరికీ ఉపయోగపడే విధంగా ఏదైనా చేయాలి అన్న ఉద్దేశంతో రీడర్స్ మీటింగులు నిర్వహించడం, వాటి ద్వారా వచ్చిన సలహాలు, సూచనల ఆధారంగా, ప్రసాద్ గారు, జీవి గారు, గిరిచంద్ గారు, శ్రీనివాస్ కర గారు, రవిశంకర్ గారు, మొయిన్ గారు, జాహ్నవి గారు, వెంకట్ గారు.. ఇలా ఎంతోమంది శ్రేయోభిలాషుల అన్నింటికీ మించి సమాజానికి ఏదైనా చేయాలి అనే తపన కలిగి ఉన్న మిత్రుల సహకారంతో ఒకరికొకరు టెక్నికల్ హెల్ప్ చేసుకోవడానికి సాంకేతిక సహాయం ఛాట్ రూమ్ నీ, అలాగే గతంలో ఫ్రీ హోస్టింగ్ లో ఉన్న ఫోరంని స్వంత డొమైన్ లోకి మార్చడం.. ఆ తర్వాత ఇటీవలనే మిత్రులందరూ కలిసి రూ. 7,000 వరకూ వెచ్చించి అద్భుతమైన సదుపాయాలు కలిగిన vBulletin ఫోరం స్ర్కిప్ట్ ని కొనుగోలు చేసి ఇంతవరకూ మనం ఆన్ లైన్ లో చూసిన పైరేటెడ్, పోర్న్ కంటెంట్ లతో కూడిన పలు ఆన్ లైన్ ఫోరంలకు విభిన్నంగా పూర్తి నాలెడ్జ్ ఓరియంటెడ్ గా టెక్నాలజీని మంచి కంటెంట్ కోసం ఎలా ఉపయోగించవచ్చో నిరూపించేలా అందరం శ్రమిస్తున్నాం.

బ్లాగు గురించి చెప్పడం మానేసి ఫోరం గురించి ఎందుకు చెబుతున్నారు అని చాలామందికి సందేహం రావచ్చు సాంకేతికాలు బ్లాగు రోజూ మీరు చూసేదే. కానీ బ్లాగు చదివేవారిలో ఫోరం సభ్యులు ఎంతమంది ఉన్నారో తెలియదు. వీలైనంత వరకూ అచ్ఛ తెలుగులో స్ర్కీన్ షాట్లతో సహా ట్యుటోరియళ్లు, చిట్కాలు వంటివి 4,500 వరకూ పోస్టులు, 3800 మంది రిజిస్టర్డ్ సభ్యులతో నిరంతరం కొత్త మార్పులతో ఫోరం ఎంత ఆకర్షణీయంగా తయారవుతోందో వీలైన వారు దయచేసి ఒక్క గంట సమయం వెచ్చించి రఫ్ గా పరిశీలించండి. ఫోరంలో కేవలం టెక్నికల్ స్టఫ్ మాత్రమే కాకుండా ఫ్లాష్ గేమ్ లు, జీటాక్, Orkut వంటివి అక్కడే వాడుకునేలా ఆప్షన్లు, మంచి ఆడియో, వీడియో పాటలు, అన్నింటికీ మించి రోజుకొక్క కొత్త మార్పు అయినా చేయాలన్న తపనతో జీవి గారు, నేను, ప్రసాద్ గారు, గిరిచంద్ గారు, జ్యోతి గారు, రవిశంకర్ గారు ఇతర మిత్రులు స్కైప్ వంటి వాటిలో, ఛాట్ లో చర్చించుకుని మరీ అర్థరాత్రిళ్లు 2.30 వరకూ మేలుకుని (జీవి గారిది, ప్రసాద్ గారిది, గిరిచంద్ గారిది, నాది జనవరి 1 నుండి ఈరోజు వరకూ ఏవరేజ్ నైట్ నిద్రపోయే సమయం 1.30) చేస్తున్న మార్పులు, తద్వారా పెరుగుతున్న విలువైన పోస్టులు, తెలుగులో మంచి టెక్నికల్ కంటెంట్.. మరింత మందికి తెలియాలన్న ఉద్దేశంతో ఈ బ్లాగు జన్మదినాన్ని పురస్కరించుకుని ఫోరం గురించి కూడా అందరికీ పరిచయం చెయ్యడం జరిగింది. ఆసక్తి ఉన్నవారు ఫోరంలో రిజిస్టర్ చేసుకుని ఓసారి పరిశీలించి చూడండి. php, html, css వంటివేమిటో తెలియని మేము వాటిని నేర్చుకుంటూ మార్పులు చేస్తున్నాం.

వెబ్ డిజైనర్లకు పనికొచ్చే Firefox Add-ons …

మీకో స్వంత వెబ్‌సైట్ ఉండి తరచూ అందులో వెబ్‌పేజీలను మార్పులు చేస్తూ, మీ సర్వర్‌కి అప్‌లోడ్ చేస్తున్నట్లయితే చిన్న చిన్న పనులకు ధర్డ్ పార్టీ సాఫ్ట్‌వేర్లపై ఆధారపడవలసిన అవసరం లేకుండా ఫైర్‌ఫాక్స్ బ్రౌజర్ కోసమే రూపొందించబడిన కొన్ని add-onలు మీకు  ఉపయోగపడతాయి. Web Developer అనే ఫైర్‌ఫాక్స్ ఎక్స్‌టెన్షన్‌ని ఉపయోగించి ఒక వెబ్‌పేజిని ప్రివ్యూ చూడడంతోపాటు అదే సమయంలో దానిని ఎడిట్ కూడా చేయవచ్చు. ఎడమచేతివైపు సోర్స్ కోడ్, కుడిచేతి వైపు వెబ్‌పేజి ప్రివ్యూ చూపించబడుతుంటుంది.

ఇకపోతే మీరు ఎడిట్ చేసుకున్న మీ వెబ్‌సైట్ పేజీలను మీ సర్వర్‌లోకి అప్‌లోడ్ చేసుకోవడానికి cute ftp వంటి కమర్షియల్ FTP క్ క్లయింట్ సాఫ్ట్‌వేర్ల్‌పై ఆధారపడకుండా FirefoxFTP అనే ఫైర్‌ఫాక్స్ add-onని  ఇన్‍స్టాల్ చేసుకుంటే నేరుగా మీ FTP అకౌంట్ ద్వారా మీ సర్వర్‍లోకి  ఫైళ్ళని అప్‌లోడ్ చేసుకోవచ్చు. మనం వెబ్‌సైట్లని డిజైన్ చేసేటప్పుడు ఆకర్షణీయంగా ఉండే ఇతర సైట్లని పరిశీలించి వాటిలో ఉండే మంచి లక్షణాలను పరిగణనలోకి తీసుకుని డిజైన్ చెయ్యడం జరుగుతుంటుంది.

ఈ నేపధ్యంలో Screengrab అనే add-onని ఇన్‌స్టాల్ చేసుకోవడం ద్వారా ఇతర సైట్లలోని కావలసిన భాగాన్ని కేప్చర్ చేసుకుని ఆఫ్‌లైన్‌లో వాటి డిజైన్‌ని విశ్లేషించి మనకు సైట్ డిజైనింగ్‌పై ఓ ఆవగాహనకు రావచ్చు.

లాప్‌టాప్‌ల విషయంలో ఈ జాగ్రత్తలు పాటించండి.

లాప్‌టాప్‌ని ఎట్టి  పరిస్థితిల్లోనూ ఇంట్లో గచ్చుపై వదిలి పక్కకు వెళ్ళకండి. ముఖ్యంగా చిన్న పిల్లలు ఉన్న ఇంట్లో ఇలా చేయడం మరీ ప్రమాదకరం. లాప్‌టాప్‌కు సర్జ్ ప్రొటెక్షన్‌ని తప్పనిసరిగా వాడండి. విద్యుత్ సరఫరాలో అకస్మాత్తుగా చోటు చేసుకునే హెచ్చు తగ్గుల మూలంగా లాప్‌టాప్‌లోని ముఖ్యమైన సున్నితమైన హార్డ్‌వేర్  భాగాలు పనికిరాకుండా పోయే ప్రమాదం ఉంది. ముఖ్యంగా విద్యుత్ సరఫరాలో ఎక్కువ అంతరాయాలు చోటు చేసుకునే ప్రదేశాల్లొ . UPSకి ఓ సర్జ్ ప్రొటెక్షన్‌ని అమర్చుకుని ఆ సర్జ్ ప్రొటెక్టర్ నుండి లాప్‌టాప్‌ని ఉంచి ఎక్కువసేపు పనిచెయ్యడం మంచిది కాదు. ఉదా.కు..బెడ్‌షీట్‌నే తీసుకుందాం. బెడ్‌షీట్‌పై లాప్‌టాప్ పెట్టడం వల్ల . లాప్‌టాప్ అడుగుభాగంలో ఉండే గాలి ప్రసరించే ప్రదేశాలు మూసివేయబడి  తద్వారా పరోక్షంగా లాప్‌టాప్ త్వరగా వేడెక్కే ప్రమాదం ఉంది. తప్పనిసరి పరిస్థితుల్లో అలాంటి మెత్తని ఉపరితలాలపై పనిచెయ్యవలసి వచ్చినప్పుడు కొద్ది నిమిషాలకోసారైనా లాప్‌టాప్‌ని పై ఎత్తి లోపలి ఉష్ణోగ్రత బయటకు వచ్చేలా అవకాశం కల్పించడం మంచి పద్ధతి.

ఆకర్షణీయమైన 3D ఎఫ్హెక్టులు పొందడానికి …

కొన్ని వెన్‌సైట్లలో టెక్స్ట్ పలు రకాల 3-D ఎఫెక్టులలో రూపొందించబడి కనిపిస్తుంటుంది కదా!! అలాంటి వాటిని చూసినప్పుడు ఎంతో గొప్ప గ్రాఫిక్ నైపుణ్యతలు కలిగిన వారు మాత్రమే ఇలా చేయగలరేమో అనే ఫీలింగ్ మనకు కలగడం సహజం. ఇలా text కి embossing, lighting, shadow  వంటి పలు రకాల 3D ఎఫెక్టులనుఎవరైనా పదంటే పదే నిముషాల్లో తయారు చేసుకునేలా Ulead Cool 3D అనే సాఫ్ట్‌వేర్ వీలు కల్పిస్తుంది. Textని 3D లో ఏనిమేట్ చెయ్యడం కూడా వీలవుతుంది.

మనమంతా ఒక్కటే….

టెక్నాలజీ వల్ల మనుషులు దూరమయ్యారనే విషయంలో వాస్తవం ఎంత ఉందో తెలీదు కానీ.. టెక్నాలజీని పాజిటివ్ కోణంలో వాడుకుంటే మనుషుల మధ్య మృగ్యమైపోతున్న మానవ సంబంధాలు ఎంతో కొంత బలీయం అవుతున్నాయన్పిస్తోంది నాకు. ఉదయం నుండి సాయంత్రం వరకూ ఆఫీస్ బిజీ, మీటింగులు, సామాజికంగానూ, ఆర్థికంగానూ స్థిరపడడానికి, ఎదగడానికి ఒంటిని గుల్ల చేసుకుంటూ, మనసుని ఒంటరిగా వదిలేస్తూ కాలం సాగదీసే సగటు పిసి యూజర్.. కూడలిలో బ్లాగు పోస్టులను చదివితే, ఆయా బ్లాగుల కామెంట్లను చదువుతూ పోతే స్పందించే మనసున్న ఎందరో ఆత్మీయులు మన చెంతనే మనకు తోడుగా ఉన్న భావన కలుగక మానదు. టెక్నికల్ నాలెడ్జ్ ని సేవాభావంతో షేర్ చేద్దామనే కంప్యూటర్ ఎరా ప్రాజెక్ట్ కి ఇప్పటికి నూటా యాభై మందికి పైగా డెడికేటెడ్ సభ్యులు బాసటగా నిలిచి ఏకత్రాటిపై పనిచేస్తున్నారు. అందరూ ఎవరి వ్యక్తిగత పనుల్లో వారు బిజీనే! కానీ కలిసిన కొంతసేపైనా ఒకరి బాగోగులు ఒకరు తెలుసుకుంటూ, వీలైన ప్రతీ సందర్భంలో ఒకరికొకరు వర్చ్యువల్ వరల్డ్ (ఇంటర్నెట్)లోనే కాకుండా నేరుగా కలుస్తూ కూడా సహాయం చేసుకుంటూ తమ మానవత్వాన్ని, సహాయతత్వాన్ని చాటుకుంటున్నారు. అందరిలోనూ తమకు చేతనైనది ఇంకేదైనా సమాజానికి చేయాలన్న తపన కన్పిస్తుంది. ఎవరు ఎక్కడ ఉంటారో, ఏం చేస్తుంటారో, రూపురేఖలు ఎలా ఉంటాయో.. ఏమీ తెలియవు, అయినా అందరూ ఒక కుటుంబంలో సభ్యుల్లా మసలుకుంటుంటాం. ప్రసాద్ గారు, జ్యోతి గారు, జీవి గారు, గిరిచంద్ గారు, రవిశంకర్ గారు, శ్రీనివాస్ కర గారు, రాఘవ, సురేష్, వెంకట్, మధు, సాయిచరణ్, మహేష్, మొయిన్, స్వామి, నాగభూషణం, రామచంద్రరావు, వాణి, జాహ్నవి, రాధిక.. ఇలా చెప్పుకుంటూ పోతే ఎంతో మంది ఆత్మీయులు. అందరిలోనూ స్నేహతత్వమే.

అటు బ్లాగుల లోకంలోకి వస్తే జూలై 9, 2007 వరకూ నాకు ఆన్ లైన్ లో ఎవరితోనూ పరిచయాలు లేవు. జ్యోతి గారు, వీవెన్, చావా కిరణ్, సుధాకర్, కొత్తపాళీ గారు, చదువరి గారు, దాట్ల రాజు గారు, చరసాల ప్రసాద్ గారు, మాగంటి గారు, వెంకట రమణ, సి.బి.రావు గారు, దేవరపల్లి రాజేంద్ర, పరుచూరి శ్రీనివాస్ గారు, ప్రవీణ్ గార్లపాటి, దిన్నెల కుమార్, స్వాతి కుమారి, లలిత గారు, రాధిక, నిషిగంధ, రమణి గారు, కొండవీటి సత్యవతి గారు, వింజమూరి విజయకుమార్.. ఇలా ఎందరో మహానుభావులతో అతి కొద్ది కాలంలోనే పరిచయం ఏర్పడింది. ఇంతమంది పేర్లని ఎందుకు ప్రస్తావించానంటే వీరందరూ ఏదో సందర్భంలో నాకు మోరల్ గా సపోర్ట్ అందించి ఏ దశలోనూ చేసే పనిపట్ల ఉత్సాహం కోల్పోకుండా వివిధ రూపాల్లో సహాయం చేసిన వారే. ఇంకా చాలామంది పేర్లు ఉన్న ఫళాన స్ఫురణకు రావట్లేదు కూడా! మన్నించండి. కూడలి కబుర్లలోకి వెళితే ఎంతో ఆప్యాయంగా పలకరిస్తారు. ప్రమదావనంకి వెళితే ఎంతో పరిచయం ఉన్న వారిలా అందరూ ప్రశ్నల వర్షంతో ఉక్కిరి బిక్కిరి చేసి కొత్తదనం పోగొట్టారు. వివిధ మీటింగుల్లో పలువురు మిత్రులను కలిసే భాగ్యమూ లభించింది.

వేర్వేరు ప్రాంతాల్లో నివశిస్తూ వేర్వేరు అభిప్రాయాలు కలిగిన వ్యక్తులు ఎవరూ ఎవరినీ నొప్పించుకోకుండా వీలైనంత వరకూ ఒకరినొకరు మోరల్ గా సపోర్ట్ చేసుకుంటూ ప్రొడక్టివ్ గా ఓ కమ్యూనిటీ క్రియేట్ అవడం ఖచ్చితంగా ఓ గొప్ప పరిణామం. టెక్నాలజీ యాహూ ఛాట్ రూమ్ ల వంటి వాటిలో బ్రష్ణుపట్టిపోతోంది అనే ఇన్ సెక్యూరిటీలు, జుగుప్సలను దాటుకుని అదే టెక్నాలజీతో మానవ సంబంధాల మధ్య ఓ వారధి నిర్మితమవుతోంది అనడానికి ఇది చక్కని నిదర్శనం. ఇంటర్నెట్లో వేర్వేరు కోట్లాది బ్లాగులు ఉన్నా.. నాకున్న పరిమితమైన నాలెడ్జ్ లో ఇంతవరకూ ఇలా అందరూ ఒకరికొకరు బాసటగా నిలుచుకుంటూ, వీలైనప్పుడు సమావేశమవుతూ సమస్యలని కలసికట్టుగా పరిష్కరించుకుంటూ ముందుకు సాగడం ఎక్కడా కన్పించలేదు. మన సమస్యలు పరిష్కరించుకోవడానికి మనం “తెలుగు బ్లాగు గూగుల్ గుంపు, కూడలి కబుర్లు“ వంటి వేదికలను నిర్మించుకున్నాం. రమణి గారు తన బ్లాగు పోస్టులో చెప్పినట్లు తరచూ సమావేశమవుతూ మన చక్కని వాతావరణం పదిలంగా కొనసాగేలా జాగ్రత్తలు తీసుకోవచ్చు. వ్యక్తులను టార్గెట్ చేసుకుని వారి స్ఫూర్తిని దెబ్బతీసేలా వ్యాఖ్యలు రాయడం, లేనిపోని ఇన్ సెక్యూరిటీ, సెన్సిటివిటీలకు లోనై మన విశ్లేషణాశక్తిని వృధాపరచడం వంటి వాటికి దూరంగా మనమూ ప్రొడక్టివ్ గా, అందరిలో కలుస్తూ, అందరినీ కలుపుకుపోతూ చక్కని వాతావరణంలో ఇమిడిపోలేమా? ఇటీవల కొన్ని చిన్న చిన్న విషయాలు కూడా అంత చర్చనీయాంశం అవుతుంటే ప్రతీ ఒక్కరిలో ఓ రకమైన నిర్లిప్తత నెలకొంటుంటే, ఇదే ధోరణి కొనసాగితే ఎవరో అన్నట్లు ఇన్నాళ్లూ కలిసి ఉన్న అందరం ఒకరొకరిగా ఒంటరిగా మిగలక తప్పదేమో. మనమంతా ఒకటి. ఎన్నో రకాలుగా ఇంటరాక్ట్ అవుతూ ప్రతీ ఒక్కరి మధ్యా ఓ అనుబంధం పెనువేసుకున్నాం. దాన్ని చేజేతులా నాశనం చేసుకునే దశకు చేరకముందే తగిన జాగ్రత్తలు తీసుకుంటే మేలు.
–
http://computerera.co.in/chat/
http://computerera.co.in/forum/

నాకేంటి లాభం ??