విహారి – బ్లాగు సమీక్ష
Aug 5th, 2008 | By | Category: Uncategorized
నా దృష్టిలో ఒక విషయాన్ని ఎవరు రాసారో తెలియకుండా చదివి లేదా చూసి మనస్ఫూర్తిగా నవ్వుకోగలిగితే, అది నాణ్యమైన హాస్యం కింద లెఖ్ఖ. ఎవరు రాసారో తెలిసి చదివినా నవ్వు రావొచ్చు, కానీ ఆ నవ్వులో మొదట చెప్పిన పరిస్థితిలో ఉన్నంత స్వచ్ఛత ఉండకపోవచ్చు. కారణాలు అనేకం. ఉదా: ఆ రచయితపై అప్పటికే ఓ విధమయిన మంచి అభిమానం ఏర్పడటం వగైరాలు. కాబట్టి తనెవరో తెలిసిన పాత పాఠకులతో పాటు, తనెవరో తెలియని కొత్త పాఠకులని కూడా ఎప్పటికప్పుడు నవ్వించగలిగేవాడే మంచి హాస్యాన్ని పండించేవాడు. ఓ రకంగా కొత్త పాఠకుడే ఈ విషయంలో హాస్య సృష్టికర్తకి సరైన సమీక్షకుడు.
ఈ దృష్ట్యా చూస్తే, తెలుగు బ్లాగుల్లో హాస్యానికి మంచి చిరునామా విహారి బ్లాగు అనటంలో సందేహం లేదు. పాతవాళ్ళను అలరిస్తూనే, క్రొత్త వారిని ఆకట్టుకోవటంలో విహారి సిద్ధహస్తుడు. నేను దాదాపుగా ఓ సంవత్సరకాలంగా విహారి బ్లాగు పాఠకుణ్ణే. హాస్యాన్ని ఓ నిమిషం పక్కనపెడితే, ఓ రచయితగా విహారికి భాషమీదున్న పట్టు బ్లాగుని హాస్యంతో నిమిత్తం లేకుండా కూడా చదివిస్తుంది. హాస్యం గిలిగింతలు పెడితే, వ్యంగ్యం కలిసిన హాస్యం పొట్టచెక్కలు చేయిస్తుంది. నిజానికి వ్యంగ్యం మరియు హాస్యం ఒకదానికొకటి సహకరిస్తూ ఉంటే తప్ప అచ్ఛంగా హాస్యం అన్ని వేళళా రక్తి కట్టకపోవచ్చు. విహారి బ్లాగుల్లో కావలిసినంత హాస్యము, అంతకు మించిన వ్యంగ్యమూ నిత్యం విలసిల్లుతూ ఉంటాయి. ఉదాహరణకి, కాదరయ్యా Vs బ్లాగరయ్యా టపాలో కొత్త బ్లాగరి కష్టాలు వ్యంగ్యాత్మకంగా చెబుతున్నాడు చూడండి.
ఇలా చెప్పుకుంటూ పోతే, ఏవో ఒకట్ల సంఖ్యలో టపాలు తప్పించి ప్రతి టపా ఒక ప్రత్యేక టపా స్థాయిలో ఉంటాయనటంలో అనుమానం లేదు. చదివే ఓపికా, తీరికా ఉండాలే గానీ చదివి మనసారా నవ్వుకోగలిగే టపాలు కోకొల్లలు.
ఇంతటి మంచి విందు భోజనంలో ఒకటి అరా ఫిర్యాదులు ఉన్నాయి.
మొదటిది, టపాల సైజు. తరచుగా విహారికి తాను అందిస్తున్న ఈ తీపి తీపి వంటకాన్ని పెద్ద మొత్తములో వడ్డించటం అలవాటు. ఈ విషయంలో కొద్దిగా జాగ్రత్త అవసరం.
రెండోది, విహారి పాత టపాలు శోధించటం అంటే, నిజంగా గనిలోనుంచి బొగ్గు తవ్వి తీసినంత కష్టమైన పని. సమీక్షకుడిగా నా కష్టాలే అందుకు సాక్షి. బహుశా, పాత టపాలను వేరే చోటికి తరలించి బ్లాగు వేగమందుకునేలా చెయ్యాలేమో.
హాస్యం పండించటం నిజంగా కత్తి మీద సామే. కాస్త గతి తప్పినా హాస్యం కాస్త అపహాస్యం అవుతుంది. అదీ వ్యంగ్యప్రధానమయితే మరింత ఒళ్ళు దగ్గరపెట్టుకు రాయటం అవసరం. లేకపోతే, పాఠకుల ఆగ్రహాన్ని కూడా చవిచూడాల్సి రావచ్చు. ఈ సాధక బాధకాలని తట్టుకుంటూ, విహారి తడబాటు లేకుండా హాస్యాన్ని పండిస్తూనే ఉన్నాడు. విహారి హాస్య ప్రస్థానం ఇలానే కొనసాగాలని మనస్ఫూర్తిగా కోరుకుంటున్నాను.
ఈ బ్లాగు సమీక్ష రాసింది మనలోని ఒక ప్రముఖ బ్లాగరు.కాని అది ఎవరో గుర్తించమని విహారి కి చాలెంజ్ విసిరారు సమీక్షకులు.. మిగతావారు ఎవరైనా చెప్పగలరా??
తాబాసు గారు?
నిస్సందేహంగా సీబీరావుగారే.
బహుశా జనం గుర్తు పట్టేస్తారనేమో.. పక్షి బొమ్మ పెట్టలేదు!!
పై వాక్యభాగంలో దొర్లిన రెండు అక్షరదోషాలే ఇది రాసినది తాలబాసు గారు కాదనడానికి ఋజువు. సీబీరావు గారు రెండేళ్ల నుంచి తెలుగు బ్లాగులోకంలో ఉండగా ఈ సమీక్షకుడు మాత్రం
అంటున్నారు. ఇద్దరి మధ్యా సంవత్సరం తేడా ఉంది.
బహుశా జనం గుర్తు పట్టకుండానేమో… అలా అంటున్నారు!
ముందుగా నా బ్లాగును సమీక్షించి అన్నీ మంచి వాక్యాలే చెప్పినందుకు కృతజ్ఞతలు. కొంచెం ఎక్కువ కన్సెషన్ ఇచ్చినట్లున్నారు
ఇక పెద్ద టపాలు ఈ మధ్య బాగానే తగ్గించుకున్నా.పాత వాటిని శొధించడానికి సమయం ఎక్కువ తీసుకుంటుందన్నారు. నేను వర్డు ప్రెస్సును నా డొమైన్ లో వ్యస్థాపితం చేసుకున్నప్పుడు కుదురుతుందేమో చూడాలి.
చదవగానే రావు గారు అనిపించింది. కానీ ఒక సంవత్సర కాలంగా పాఠకుణ్ణి అనే దగ్గర అనుమానాలొచ్చాయి.
– విహారి
విహారి గారి బ్లాగు సమీక్షని రాసినది “వికటకవి” శ్రీనివాస్ గారు. ఆయనకు, స్పందించిన బ్లాగు మిత్రులకు ధన్యవాదాలు.