యాపిల్ సంస్థకు చెందిన వైర్లెస్ AirPodల గురించి చాలామందికి తెలిసిందే. తైవాన్‌కి చెందిన Ben Hsu అనే వ్యక్తి మ్యూజిక్ వింటూ పడుకున్నప్పుడు తెలియకుండానే నిద్ర లోకి జారుకున్నాడు. ఎలా జరిగిందో గానీ అతని AirPod జతలో ఒకటి అతను పొరపాటున మింగేశాడు.
నిద్ర లేచాక చూసుకుంటే, రెండింటిలో ఒక AirPod కనిపించని విషయం గమనించి.. వెంటనే యాపిల్ ట్రాకింగ్ సిస్టం ద్వారా అది ఎక్కడ ఉందో గుర్తించడానికి ప్రయత్నించాడు. యాపిల్ సంస్థ అది దగ్గరగా ఉన్న విషయం చూపించడంతో పాటు ఒక టెస్ట్ సౌండ్ ప్లే చేసింది. Hsu ఆ శబ్దాన్ని వినగలిగాడు. అయితే అది ఎక్కడ నుండి వస్తుందో గుర్తించలేకపోయాడు.
బెడ్ షీట్ క్రింద వెదికాడు. అన్ని చోట్ల వెతికాడు. చివరకు అది తన కడుపులో నుండి శబ్దం వస్తున్నట్లుగా గుర్తించాడు. ఆ తర్వాత హాస్పిటల్‌కి వెళితే అది అతని కడుపులో ఉన్నట్లు డైజెస్టివ్ సిస్టం ద్వారా బయటకు వచ్చే ప్రయత్నంలో ఉన్నట్లు హాస్పిటల్ వెల్లడించింది. విచిత్రంగా మరుసటి రోజు అది బయటకు రావడంతో పాటు, సక్రమంగా పనిచేయడం కూడా మొదలు పెట్టింది. అప్పటికి 41% బ్యాటరీ కూడా మిగిలి ఉండటం గమనార్హం.
ఎలక్ట్రానిక్ గాడ్జెట్ మింగడం ఇది మొదటిసారి కాదు. 2016లో ఐర్లాండ్ కు చెందిన ఒక వ్యక్తి ఏకంగా సెల్ఫోన్ మింగేశాడు. ఆ తర్వాత ఒక సర్జరీ చేయడం ద్వారా డాక్టర్లు దాన్ని బయటకు తీశారు. అలాగే దక్షిణ కొరియాకు చెందిన 13 సంవత్సరాల అమ్మాయి Misfit Shine అనే ఫిట్నెస్ ట్రాకర్‌ని మింగేసింది. డాక్టర్లు దాన్ని తొలగించిన తర్వాత కూడా అది బేషుగ్గా పనిచేసింది.
