ఈ సంవత్సరం జూన్ 29 మొదలుకొని ఇప్పటి వరకు అనేక దశలు గా వివిధ రకాల చైనా అప్లికేషన్లను నిషేధించిన భారత ప్రభుత్వం తాజాగా మరోమారు మరికొన్ని చైనా అప్లికేషన్లను నిషేధించే సన్నాహాలు చేస్తోంది.
దీనికోసం Android యూజర్లు ఉపయోగించే Google Play Store, Apple Apple Storeలలో ఎక్కువ మంది వినియోగదారులు డౌన్లోడ్ చేసుకుంటున్న చైనా అప్లికేషన్లను జల్లెడ పడుతున్నట్లు సమాచారం. వాస్తవానికి ఐదు రోజుల క్రితం నవంబర్ 24న భారత ప్రభుత్వం 43 చైనా అప్లికేషన్లను ఇండియాలో నిషేధించింది. వీటిలో బాగా ప్రముఖంగా వాడబడే ఆలీబాబా వర్క్ బెంచ్, CamCard వంటి అప్లికేషన్స్ కూడా ఉండడం గమనార్హం. భారతీయ ఇన్ఫర్మేషన్ టెక్నాలజీ చట్టం లోని 69A సెక్షన్ కింద భారతీయ వినియోగదారుల డేటాను విదేశాలలో దుర్వినియోగం చేస్తున్నారు అన్న కారణాలను చూపిస్తూ ప్రభుత్వం ఈ నిర్ణయం తీసుకుంది.
నిషేధించబడిన అప్లికేషన్లకు వాటి వాదన వినిపించే విధంగా జూన్ నుండి ఏర్పాటు చేసినప్పటికీ దానికి సంబంధించిన ప్రొసీడింగ్స్ మాత్రం ఇప్పటివరకు వెల్లడి కాలేదు. మరోవైపు ఇండియాలో నిషేధించబడిన PUBG గేమ్ అసలు నిర్వాహకులైన దక్షిణ కొరియా సంస్థ భారత్‌లో తిరిగి కార్యకలాపాలు మొదలు పెట్టడానికి సన్నాహాలు చేస్తోంది. ఇన్ఫర్మేషన్ టెక్నాలజీ చట్టం లోని 69A సెక్షన్ లో దేశ సమగ్రత, భద్రతకు భంగం వాటిల్లే విధంగా ఉన్న ఏ అంశాన్నయినా తీవ్రంగా పరిగణించే వెసులుబాటు ప్రభుత్వానికి ఉంది. సరిగ్గా దాన్ని ఆసరాగా చేసుకొని ప్రభుత్వం ఈ నిర్ణయాలు తీసుకుంటోంది.
ఇప్పటికే అధిక శాతం పాపులర్ చైనా అప్లికేషన్లు నిషేధించబడ్డాయి. అవి దొంగ దారిలో వచ్చినా కూడా ఎప్పటికప్పుడు వాటిని పరిశీలిస్తూ, నిషేధించే విధంగా ప్రభుత్వం ఒక పూర్తిస్థాయి వ్యవస్థను ఏర్పాటు చేసినట్లు సమాచారం. ఈ నేపథ్యంలో భారతీయ మార్కెట్ క్యాప్చర్ చేయాలంటే తప్పనిసరిగా ఇండియాలో డెవలపర్లతో ఒప్పందాలు కుదుర్చుకుని ఇక్కడ డేటా సెంటర్లు నెలకొల్పుకుని మాత్రమే ఆయా సంస్థల కార్యకలాపాలు నిర్వహించవలసి ఉంటుంది. లేదంటే వాటి మనుగడ ఏ మాత్రం కొనసాగే అవకాశం లేదు.
