ప్రపంచవ్యాప్తంగా నెలకొన్న పరిస్థితుల నేపథ్యంలో దాదాపు అందరు ఇంటి దగ్గర ఉండడం వల్ల వీడియో కంటెంట్ మీద బాగా డిమాండ్ పెరిగింది. ఈ కారణం చేత అనేక స్ట్రీమింగ్ సర్వీసులు ఇబ్బందులు పడుతున్నాయి. మరోవైపు ఇంటర్నెట్ సర్వీస్ ప్రొవైడర్లు కూడా చాలా ఇబ్బంది పడుతున్నారు.
దీన్ని దృష్టిలో పెట్టుకొని Amazon Prime, Netflix వంటివి ఇప్పటికే వీడియో క్వాలిటీ తగ్గించడానికి సన్నాహాలు చేస్తున్నాయి. ఈ నేపథ్యంలో అధిక శాతం మంది ఆధారపడే Youtube కూడా హై క్వాలిటీ వీడియోలకు బదులుగా 480p రిజల్యూషన్ ఉన్న స్టాండర్డ్ క్వాలిటీ వీడియోలను మాత్రమే ఇక మీదట చూపించబోతోంది. మీరు ఏదైనా యూట్యూబ్ వీడియో మీద క్లిక్ చేసినప్పుడు అది ఆటోమేటిక్ గా 480pలో ప్లే అవుతుంది. మీ దగ్గర ఎంత హై స్పీడ్ కనెక్షన్ ఉన్న ఇంటర్నెట్ వున్నప్పటికీ వీడియో క్వాలిటీ మాత్రం ఆటోమేటిక్‌గా 480pనే లభిస్తుంది.
అయితే ఇక్కడ ఊరట కలిగించే అంశం ఒకటి ఉంది. ఒకవేళ మీరు హై క్వాలిటీ వీడియో కావాలి అనుకుంటే, ఆ వీడియో సెట్టింగ్స్‌లోకి వెళ్లి HDని మీకు మీరే ఎంపిక చేసుకోవచ్చు. ప్రపంచవ్యాప్తంగా ఇంటర్నెట్ సర్వీస్ ప్రొవైడర్లకి ఊరట కల్పించడం కోసం ఈ ఏర్పాటు చేసినట్లుగా యూట్యూబ్ పేర్కొంటోంది. వాస్తవానికి కొద్ది రోజుల క్రితం వరకు యూట్యూబ్ యూరోపియన్ దేశాల్లో మాత్రమే ఇలాంటి ఏర్పాటు చేసింది. ఇప్పుడు తాజాగా ప్రపంచవ్యాప్తంగా ఈ తాజా ఏర్పాట్లు అమల్లోకి వస్తున్నాయి.
Amazon Prime ఇండియాలో వీడియో రిజల్యూషన్ బాగా తగ్గించింది. దీనికి సంబంధించి కొద్ది రోజుల క్రితమే మన ” కంప్యూటర్ ఎరా”లో ప్రస్తావించిన విషయం తెలిసిందే. సెల్యూలర్ ఆపరేటర్స్ అసోసియేషన్ ఆఫ్ ఇండియా కొద్ది రోజుల క్రితం దీనికి సంబంధించి ప్రతిపాదనలను పంపించిన నేపద్యంలో ఈ మార్పులు చోటు చేసుకున్నాయి.
