Facebook, Instagram, Whatsappలలో ఏదైనా విషయాన్ని అవతల వాళ్ళకి దృశ్యపరంగా చెప్పడానికి చాలామంది స్మైలీలు, స్టిక్కర్లు, యానిమేషన్ల వంటి వాటిని వాడతారు కదా!
అయితే ఇప్పటివరకు కేవలం పరిమిత సంఖ్యలో మాత్రమే ఇలాంటి యానిమేషన్లు సంబంధిత అప్లికేషన్లలో లభిస్తున్నాయి. తాజాగా ఫేస్బుక్ సంస్థ GIPHY సంస్థను కొనుగోలు చేయడంతో పరిస్థితి మారబోతోంది. GIPHY అనేక మందికి సుపరిచితమైన సంస్థ. ఇందులో భారీ మొత్తంలో వివిధ సందర్భాలకు తగినట్లు GIF యానిమేషన్ ఇమేజెస్ లభిస్తుంటాయి. ఈ సంస్థను ఫేస్బుక్ 400 మిలియన్ డాలర్లు చెల్లించి సొంతం చేసుకుంది.
మొదటి దశలో Instagram సర్వీస్ లో దీన్ని ఇంటిగ్రేట్ చేయబోతున్నట్లు ఆ సంస్థ వెల్లడించింది. దీని ప్రకారం ఇక మీదట ఇంస్టాగ్రామ్ వాడుతున్న వినియోగదారులకు కావలసినన్ని యానిమేటెడ్ ఇమేజెస్ లభించబోతున్నాయి. దశలవారీగా ఈ GIPHY సర్వీసును తన ఇతర ప్రోడక్టులు అయిన Facebook, Whatsappలకు కూడా విస్తరించబబోతున్నట్లు ఆ సంస్థ ప్రతినిధులు తెలిపారు.
Facebook మొదటి నుండి బాగా పాపులర్ అయిన వివిధ సర్వీసులను కొనుగోలు చేస్తూ వస్తోంది. Instagram, Whatsapp వంటివి కూడా అలా కొనుగోలు చేయబడినవే. మున్ముందు మరిన్ని ప్రముఖ సర్వీసులను కొనుగోలు చేసే యోచనలో ఫేస్బుక్ ఉన్నట్లు తెలుస్తోంది. సోషల్ మీడియా మీద మరింత ఆధిపత్యం చెలాయించడానికి ఇది ఫేస్ బుక్ కు మార్గం సుగమం చేస్తుంది.
మరీ ముఖ్యంగా తాజాగా GIPHYని సొంతం చేసుకోవడం చాలా కీలకమైన పరిణామం. ఇటీవలి కాలంలో అధిక శాతం మంది వినియోగదారులు అక్షరాల ఆధారంగా కమ్యూనికేషన్‌కి స్వస్తి పలికి విజువల్ కమ్యూనికేషన్ వైపు దృష్టి సారిస్తున్న తరుణంలో సమీప భవిష్యత్తులో ఈ తాజా చర్య ఫేస్బుక్ సంస్థకు చాలా మేలు చేయబోతోంది. దురదృష్టవశాత్తు ఇప్పటికే ఫేస్బుక్ వంటి సైట్లలో భాష రూపంలో భావాలను వ్యక్తపరిచే వారు తగ్గి పోతున్నారు. ముందు ముందు ఆ సంఖ్య మరింత తగ్గే ప్రమాదం లేకపోలేదు.