Android ఆపరేటింగ్ సిస్టమ్ ఆధారంగా పనిచేసే ఫోన్లు వాడేవారు కొత్తగా ఏదైనా అప్లికేషన్ లేదా గేమ్ డౌన్లోడ్ చేసుకోవాలంటే తప్పనిసరిగా Google Play Store మీద ఆధారపడుతుంటారు. అయితే దానికి ప్రత్యామ్నాయంగా తాజాగా మరో అప్లికేషన్ స్టోర్ కూడా అందుబాటులోకి వచ్చింది.
Huawei సంస్థ అందరికీ సుపరిచితమే. కొంత కాలం క్రితం అమెరికా ప్రభుత్వం ఈ సంస్థ తయారు చేసే ఉత్పత్తుల మీద నిషేధం విధించిన విషయం తెలిసిందే. ఆ దరిమిలా గూగుల్ సంస్థ కూడా Huawei సంస్థ తయారు చేసే smartphoneలకి గూగుల్ ప్లే స్టోర్ తో సహా అన్ని రకాల సర్వీసులు అందించడం నిలిపివేసింది. దీంతో ప్రత్యామ్నాయ ఏర్పాట్లపై Huawei సంస్థ దృష్టి సారించింది.
తనకంటూ ప్రత్యేకంగా ఒక ఆపరేటింగ్ సిస్టం తయారు చేసుకోవటం మాత్రమే కాకుండా, ఆండ్రాయిడ్ అప్లికేషన్లను భారీ మొత్తంలో అందించే ఒక ప్రత్యామ్నాయ అప్లికేషన్ ఆ స్టోర్ కూడా అందుబాటులోకి తీసుకొచ్చింది. AppGallery పేరుతో పిలవబడే ఈ అప్లికేషన్ గ్యాలరీలో అనునిత్యం మనకు ఉపయోగపడే అన్ని రకాల అప్లికేషన్స్ లభిస్తాయి. ఇండియాలో Huawei సంస్థ విక్రయించబోతున్న అన్ని రకాల స్మార్ట్ఫోన్లలో ఈ అప్లికేషన్ గ్యాలరీ దర్శనం ఇవ్వనుంది. భారతీయ వినియోగదారులు అధికంగా వాడే 95% అప్లికేషన్లు ఇప్పటికే తమ అప్లికేషన్ గ్యాలరీ లో ఉన్నాయని ఆ సంస్థ చెబుతోంది. అలాగే ప్రముఖంగా ఉన్న మొత్తం 2000 భారతీయ అప్లికేషన్లలో 150 అప్లికేషన్లు App Galleryలో లభిస్తున్నట్లు ఆ సంస్థ చెబుతోంది.
భారతీయ వినియోగదారులు ఎక్కువగా ఇష్టపడే దాదాపు 5 వేల అప్లికేషన్లను అతి త్వరలో వారికి అందుబాటులోకి తీసుకురానున్నట్లు ఆ సంస్థ వెల్లడించింది. Huawei సంస్థ విడుదల చేస్తున్న Honor 9X Proలో ఈ సరికొత్త అప్లికేషన్ గ్యాలరీ డిఫాల్ట్ గా ఇన్ స్టాల్ చేయబడి ఉంటుంది. గూగుల్ మ్యాప్స్ కి బదులుగా MapmyIndia అప్లికేషన్ పొందుపరచబడి ఉంటుంది. అలాగే గూగుల్ క్రోమ్ బ్రౌజర్కి బదులుగా Jio Browser లభిస్తుంది. Whatsapp, Facebook వంటి అప్లికేషన్లను నేరుగా సంబంధిత వెబ్ సైట్ల నుండి డౌన్లోడ్ చేసుకోవచ్చు. ఇకపోతే Gmail వాడాలి అనుకునేవారు వెబ్ బ్రౌజర్ ద్వారా దాన్ని కాన్ఫిగర్ చేసుకోవచ్చు.