amazon

Amazon Flipkart ఆన్లైన్ షాపింగ్ సైట్లలో  వస్తువులను విక్రయిస్తున్న అనేకమంది చిన్న, మధ్య తరహా  అమ్మకందారులు ఆయా సంస్థలు తమను దోపిడీ చేస్తున్నాయని, ఈ విషయంలో ప్రధాన మంత్రి జోక్యం చేసుకుని తమకు న్యాయం చేకూర్చాలని, ప్రధానమంత్రిని అభ్యర్థించాయి.

ఆల్ ఇండియా ఆన్లైన్ వెండర్స్  అసోసియేషన్ (AIOVA) ఆరోపణ ప్రకారం, Amazon, Flipkart  వంటి ఆన్లైన్ షాపింగ్ వెబ్ సైట్లు ఎలాంటి నియంత్రణ లేకుండా,  ఏకఛత్రాధిపత్యంగా వ్యాపారాలు నిర్వహిస్తున్నాయని తెలుస్తోంది. Amazon సంస్థ వచ్చేవారం Small Business Day పేరిట  చిన్న తరహా వ్యాపారులకు ప్రయోజనం చేకూరే విధంగా ప్రత్యేకంగా సేల్ నిర్వహించబోతున్న తరుణంలో ఇలాంటి ఆరోపణలు రావడం గమనార్హం.

భారతీయ రిటైల్ పరిశ్రమ Amazon, Walmart వంటి రెండు విదేశీ సంస్థల చేతుల్లోకి వెళ్లాయని,  మొత్తంమీద 3,500 మంది ఆన్లైన్ అమ్మకందారులు అసోసియేషన్‌‌లో భాగస్వాములుగా ఉన్నారు. ఆన్లైన్ షాపింగ్ సైట్లు కేవలం కొద్దిమంది పెద్ద పెద్ద అమ్మకం దారులకు మాత్రమే పూర్తిస్థాయి ప్రాధాన్యత కల్పిస్తున్నాయని,  దాంతో తమ వస్తువులు అమ్ముడుపోక ఆర్థికంగా బాగా నష్టపోవలసి వస్తోందని చిన్న వ్యాపారులు ఆవేదన వ్యక్తం చేస్తున్నారు.

అమెజాన్‌లో నాలుగు లక్షల వరకు అమ్మకందారులు ఉన్నారని, వారందరిలో అధికశాతం మంది చిన్న మరియు మధ్య తరగతి వ్యాపారస్తులని.. ఐదేళ్ల క్రితం తమ కార్యకలాపాలు ఇండియాలో మొదలుపెట్టినప్పటి నుండి పారదర్శకమైన మార్కెట్‌ప్లేస్  రూపకల్పన దిశగా అవిశ్రాంతంగా కృషి చేస్తున్నామని అమెజాన్ ఇండియా ప్రతినిధులు తెలుపుతున్నారు.

ఆన్లైన్ షాపింగ్ సైట్లలో వస్తువులను అమ్మే చిన్న వ్యాపారస్తుల ప్రధానమైన కంప్లైంట్.. ఎవరైనా వినియోగదారుడు ఏదైనా వస్తువు కొనుగోలు చేయడానికి ప్రయత్నించినప్పుడు,  పెద్ద పెద్ద సెల్లర్స్ అమ్ముతున్న వస్తువులు మాత్రమే వారికి పై భాగంలో చూపించబడుతున్నాయని, Amazon వంటి సంస్థలు దాదాపు ఎక్కువగా అమ్ముడుపోయే హెడ్‌ఫోన్లు వంటి చిన్న చిన్న వస్తువులను Amazon Basics పేరిట  తమకు తాము తయారు చేసి వాటి వినియోగదారులకు ఆకర్షణీయంగా చూపించబడే విధంగా ప్రదర్శిస్తున్నాయి అన్నది ఆరోపణ.

మరి ప్రధాని కార్యాలయం,  ప్రధానమంత్రి ఆన్లైన్ షాపింగ్ సైట్లలో అమ్మకాలు జరుపుతున్న చిన్న  వ్యాపారస్తుల ప్రయోజనాలు కాపాడే విధంగా ఎలాంటి చర్యలు తీసుకుంటారో వేచి చూడాల్సి ఉంది.

దసరా,  దీపావళి వంటి ప్రత్యేకమైన పండుగల సీజన్ వచ్చినప్పుడు Amazon, Flipkart వంటి  ఆన్లైన్ షాపింగ్ సైట్లలో కోట్ల కొద్ది వ్యాపారం జరుగుతూ ఉంటుంది.

వీటిలో ప్రధానంగా కొనుగోలు చేసేవి smartphoneలు,  ఆ తర్వాత TVలు, ఇతర ఎలక్ట్రానిక్ గాడ్జెట్స్. అయితే ఈసారి స్మార్ట్ఫోన్లు, టీవీల తర్వాత అధిక శాతం మంది భారతీయులు మన ప్రత్యేకమైన కేటగిరీ మీద ప్రత్యేకంగా దృష్టి పెట్టారు.  అదే Air Purifiers. దేశవ్యాప్తంగా వాయు కాలుష్యం, ఆరోగ్యం పట్ల ప్రజల్లో పెరుగుతున్న చైతన్యానికి ఇది నిదర్శనంగా నిలుస్తుంది.

ప్రపంచ ఆరోగ్య సంస్థ తాజాగా వెల్లడించిన గణాంకాల ప్రకారం,  ప్రపంచవ్యాప్తంగా బాగా కాలుష్యం ఉన్న మొత్తం పది నగరాల్లో 9 నగరాలు మన దేశంలోనే ఉండటం ప్రమాద తీవ్రతను సూచిస్తోంది.  ఇటీవల దీపావళి తర్వాత దేశ రాజధాని న్యూఢిల్లీలో ఎయిర్ క్వాలిటీ ఇండెక్స్ ఏకంగా 1000 పాయింట్లకి చేరుకుంది. ఇది 300 పాయింట్లు దాటితేనే  అత్యంత ప్రమాదకరంగా భావిస్తారు. ఇలా వాయు కాలుష్యం రోజురోజుకి పెరుగుతున్న నేపథ్యంలో, దానికి ప్రత్యామ్నాయంగా ప్రజలు గత్యంతరం లేక ఎయిర్ ప్యూరిఫైయర్లు  వాడటం మొదలు పెట్టారు.

పానాసోనిక్, Xiaomi, హనీవెల్,  ఫిలిప్స్, డైసన్ వంటి ప్రముఖ అంతర్జాతీయ కంపెనీలు 6 వేల నుండి  40 వేల రూపాయలు ధరలో ఎయిర్ ప్యూరిఫైయర్లని అందిస్తున్న నేపధ్యంలో  వీటికి గిరాకీ బాగా పెరిగింది. గతేడాదితో పోలిస్తే ఇండియాలో ఈ సంవత్సరం మూడు రెట్లు అధికంగా Air Purifiers  అమ్మకాలు సాగినట్లు Amazon సంస్థ వెల్లడిస్తోంది. ముఖ్యంగా దీపావళి సమయంలో వీటి అమ్మకాలు గణనీయంగా పెరగడం గమనార్హం. నా దగ్గర ఉన్న Mi AirPurifier Reviewని ఈ క్రింది వీడియోలో చూడొచ్చు. 

ఇండియాలో Amazon  సంస్థ కొద్దికాలం క్రితం ఇండియా లో ప్రవేశించింది కానీ,  అంతకుముందు US, UK, ఇటలీ, స్పెయిన్, జర్మనీ, ఫ్రాన్స్ వంటి  అనేక దేశాల్లో కార్యకలాపాలు నిర్వహిస్తోంది.

తాజాగా  ప్రపంచవ్యాప్తంగా Black Friday 2018 అమ్మకాలు జరుగుతున్న నేపధ్యంలో Amazon సంస్థకి  దాని ఉద్యోగుల నుండి తీవ్ర ప్రతిఘటన ఎదురైంది. సంస్థ గిడ్డంగుల్లో సరైన సదుపాయాలు లేవని,  పని వత్తిడి విపరీతంగా ఉంటోందని ప్రపంచ వ్యాప్తంగా పలు దేశాల్లో Amazon ఉద్యోగులు సమ్మెకు దిగారు.  భారతీయ ఉద్యోగులు మాత్రం దీంట్లో పాల్గొనటం లేదనుకోండి.

ముఖ్యంగా యూరోపియన్ దేశాల్లో ఈ సమ్మె ప్రభావం తీవ్రంగా ఉంది.  ఇటలీలో అయితే మేనేజర్ స్థాయి ఉద్యోగులు గత్యంతరం లేని పరిస్థితుల్లో షాపింగ్ బాక్స్‌లను ప్యాకింగ్ చేస్తున్నారు.  ఇదిలా ఉంటే యునైటెడ్ కింగ్డమ్‌లో రాజకీయ నాయకులు అమెజాన్ ఉద్యోగులకు బాసటగా నిలిచారు. ఉద్యోగుల ఇబ్బందులను వెంటనే పరిష్కరించాలని UK  ప్రతిపక్ష నాయకుడు పిలుపునిచ్చారు. అమెజాన్ ప్రతినిధులు దీనిపై స్పందిస్తూ, తమ దగ్గర సురక్షితమైన పని వాతావరణం ఉంటుందని, ఉద్యోగుల ఆరోపణలు అవాస్తవమని పేర్కొన్నారు.

అధికారిక లెక్కల ప్రకారం యూరోపియన్  దేశాల్లో మొత్తం 2400 మంది Amazon ఉద్యోగులు మెరుపు సమ్మెకు దిగారు.  ఉద్యోగుల నుండి నిరసన ఎదుర్కోవటం అమెజాన్ సంస్థకు ఇది కొత్త కాదు. అమెజాన్ లో విపరీతమైన పని ఒత్తిడి ఉంటుందని అందులో పని చేసిన పలువురు ఉద్యోగులు గతంలో ఆరోపణలు చేసిన సంఘటనలు కూడా ఉన్నాయి.  తాజా సమ్మెలో “మేం రోబోట్ల్స్ కాదు” అంటూ టీ షర్టులు ధరించి పలువురు ఉద్యోగులు తమ ఆగ్రహం వ్యక్తం చేస్తున్నారు.

Amazon, Flipkart వంటి  షాపింగ్ సైట్లలో ఏదైనా పండగల సీజన్ వచ్చిందంటే భారీ మొత్తంలో డిస్కౌంట్లు లభిస్తుంటాయి.

అందుకే ఎవరైనా మొబైల్ ఫోన్లు గానీ,  ఇతర ఉత్పత్తులను గానీ కొనుగోలు చేయాలంటే ఫెస్టివల్ సీజన్ వరకు వెయిట్  చేస్తుంటారు. అయితే ఇక్కడ గుర్తుంచుకోవాల్సిన విషయం వివిధ ఆన్లైన్ షాపింగ్ సైట్లలో పలురకాల ఎలక్ట్రానిక్ ఉత్పత్తులను భారీ డిస్కౌంట్‌తో విక్రయిస్తున్నది  వాటిని తయారు చేసే కంపెనీలు కాదు. ఆయా ఉత్పత్తులను స్టాక్ పెట్టుకుని తక్కువ ధరకు అమ్ముతున్న థర్డ్-పార్టీ సెల్లర్లు. ఒక్కో ఉత్పత్తిపై తమకు వచ్చే లాభాలను తగ్గించుకుని దాన్ని డిస్కౌంట్ల రూపంలో అందిస్తున్నారు.

ఇలా పెద్ద మొత్తంలో డిస్కౌంట్ లకు వస్తువులను అమ్మడం వల్ల  దాని ప్రభావం ఆయా సంస్థల బ్రాండ్ ఇమేజ్ ల మీద పరోక్షంగా పడుతోందని ఆ సంస్థలు భావిస్తున్నాయి.  అంతేకాదు, పెద్ద మొత్తంలో పెట్టుబడులు పెట్టి, వివిధ నగరాల్లో పూర్తిస్థాయిలో రిటైల్ షాపులు నిర్వహిస్తున్న ఎలక్ట్రానిక్ స్టోర్లలో  ఈ ఆన్లైన్ భారీ డిస్కౌంట్ లో ఉన్న వ్యాపారం సక్రమంగా జరగడం లేదు. చాలా మంది వినియోగదారులు బయట కన్నా ఆన్లైన్ లో తక్కువ ధరకు వస్తుంది అన్న కారణం చేత ఆన్లైన్లో కొనుగోలు చేస్తున్నారు.

ఇదిలా ఉంటే,  మరికొంతమంది థర్డ్-పార్టీ సెల్లర్లు  ప్రముఖ సంస్థలకు చెందిన నకిలీ ఉత్పత్తులను చైనా వంటి దేశాల నుండి దిగుమతి చేసుకొని, వాటి వీలైనంత తక్కువ ధరకు అమ్ముతున్నారు.  అసలుకీ, నకిలీకి తేడా తెలీని వినియోగదారులు పరోక్షంగా నష్టపోతున్నారు. ఈ నేపథ్యంలో డిస్కౌంట్ల పేరిట జరుగుతున్న ఈ మొత్తం తతంగానికి అడ్డుకట్ట వేయాలని  సోనీ, యాపిల్, యురేకా ఫోర్బ్స్ లాంటి సంస్థలు నిర్ణయించుకున్నాయి. అందులో భాగంగా, తమ బ్రాండ్లకి చెందిన ఉత్పత్తులను తమ దగ్గర అనుమతి తీసుకున్న అధీకృత డీలర్లు మాత్రమే Amazon, Flipkart వంటి  షాపింగ్ సైట్లలో విక్రయించేలా చర్యలు తీసుకుంటున్నాయి.

ఆన్లైన్ షాపింగ్ చేయడం కోసం దాదాపు ప్రతి ఒక్కరు Amazon  అకౌంట్ కలిగి ఉంటారు. మీకు కూడా అమెజాన్ లో అకౌంట్ ఉన్నట్లయితే,  మీకు ఈ రోజు అమెజాన్ నుండి ఒక మెయిల్ వచ్చి ఉండొచ్చు. కొంతమంది వినియోగదారులకు  అమెజాన్ ఈరోజు అలర్టులు పంపించింది.

దాని సారాంశం పై స్క్రీన్ షాట్ లో చూడొచ్చు. Amazon వెబ్‌సైట్ సాంకేతిక లోపం వలన మీ ఇమెయిల్ అడ్రస్ బయటకు లీక్  చేసిందని, ఆ సమస్య ప్రస్తుతం పరిష్కరించబడింది అని ఆ మెయిల్ యొక్క సారాంశం. ఒక యూజర్‌గా మనం చేసిన తప్పుల వల్ల కాదు,  సాంకేతిక లోపం వలన ఇది జరిగిందని Amazon స్పష్టం చేస్తూ, దీనికోసం ప్రత్యేకంగా పాస్వర్డ్ మార్చుకోవాల్సిన అవసరం లేదని తేటతెల్లం చేసింది.

వాస్తవానికి అంతర్గతంగా ఏం జరిగిందో వివరాలు తెలియాల్సి ఉంది. ప్రపంచవ్యాప్తంగా ఇప్పటివరకు యునైటెడ్ స్టేట్స్, యూరోప్  ప్రాంతాలకు చెందిన వినియోగదారులకు ఇ-మెయిల్స్ వచ్చినట్లు తెలుస్తోంది. పెద్ద పెద్ద టెక్నాలజీ దిగ్గజ కంపెనీల్లో ఇటీవలి కాలంలో డేటా లీక్‌లు,  సాంకేతిక పరమైన సమస్యలు వలన సర్వీసులకు అంతరాయం కలగడం ఎక్కువవుతున్నాయి. దీని పట్ల ఆయా సంస్థలు మరింత జాగ్రత్త వహించవలసిన అవసరం ఉంది. లేదంటే వినియోగదారులు తమ వ్యక్తిగత డేటా వీటిలో store చేసుకోవడానికి ఆలోచించే పరిస్థితి ఏర్పడుతుంది.

Amazon  సంస్థకు చెందిన ప్రతినిధులు ఈ తాజా సమస్య పరిష్కరించబడింది అని ప్రకటించారు.  అయితే ఎంతమంది వినియోగదారుల డేటా ప్రమాదంలో పడింది, థర్డ్-పార్టీలకు ఏమైనా ఆ డేటా చేరిందా లేదా అన్నది స్పష్టం చేయవలసి ఉంది.