amazon

Amazon  ఇండియాలో కార్యకలాపాల మొదలుపెట్టినప్పటి నుండి ఒకదాని తర్వాత మరొకటి USలో  లభిస్తున్న వేర్వేరు సర్వీసులను ఒకదాని తర్వాత మరొకటి ఇండియాలో ప్రవేశపెడుతూనే ఉంది.

Amazon Prime, Amazon Music, Amazon Prime Video, Amazon Kindle  వంటి అనేక సేవలను భారతీయ వినియోగదారులకు అందించడం మొదలుపెట్టిన Amazon  తాజాగా మరో కీలకమైన సర్వీస్ ప్రవేశపెట్టింది. అదే Amazon Audible. ప్రింటెడ్ పుస్తకాలు చదవడం కష్టంగా భావించే వారు,  వాటిలో ఉండే సమాచారం చదివి వినిపించబడితే బాగుంటుంది అనుకుంటే ఇది ఉపయోగపడుతుంది.

ప్రపంచవ్యాప్తంగా వివిధ విభాగాలకు చెందిన అనేక ప్రముఖ పుస్తకాలు ప్రస్తుతం ఆడియో బుక్స్ రూపంలో  లభిస్తున్నాయి. ఈ నేపధ్యంలో నెలకి 199 రూపాయలు చెల్లిస్తే చాలు, అమెజాన్ వెబ్ సైట్‌లో మీకు నచ్చిన ఆడియో బుక్స్ ఆడియో రూపంలో వినొచ్చు. ఈ సర్వీస్ ఇప్పుడే ప్రారంభించబడిన నేపధ్యంలో  దీన్ని కొద్దిరోజులు వాడి చూడాలనుకునే వారి కోసం ప్రస్తుతం 30 రోజుల ట్రయల్ ఉచితంగా లభిస్తోంది. మరికొంత మంది వినియోగదారులకు 90 రోజుల ట్రయల్ అందించబడుతోంది.

ఆరు నెలల కాలానికి 1,345 రూపాయలు, 12  నెలల కాలానికి 2,332 రూపాయలు subscription చెల్లించడం ద్వారా మీకు నచ్చిన ఆడియో పుస్తకాలను నిరంతరాయంగా వినొచ్చు. ఈ  సర్వీస్ ప్రయత్నించాలనుకుంటే వారు https://www.audible.com/ అనే వెబ్‌సైట్ సందర్శించవచ్చు. ప్రస్తుతానికి అనేక ఆంగ్ల పుస్తకాలు ఆడియో బుక్స్ రూపంలో అందుబాటులో ఉన్నాయి.

Amazon, Flipkart  వంటి ఆన్లైన్ షాపింగ్ సైట్ లలో కనిపించే అన్ని రకాల ప్రొడక్టులను గుడ్డిగా నమ్మకండి.  చాలా సందర్భాల్లో ప్రముఖ బ్రాండ్ పేర్లతో నకిలీ ఉత్పత్తులు తమకు పంపించబడ్డాయని దేశవ్యాప్తంగా అనేక మంది మొత్తుకుంటున్నారు.

తాజాగా నిర్వహించిన ఒక సర్వే ప్రకారం,  ఆన్లైన్ షాపింగ్ సైట్లలో కొనుగోలు చేసే కొన్ని నిర్దిష్టమైన ప్రొడక్టులు ఎక్కువగా నకిలీవి ఉంటున్నాయట.  ప్రధానంగా పెర్‌ఫ్యూమ్‌లు, డియోజరెంట్లు, ఇతర కాస్మటిక్ విభాగాలకు చెందిన ఉత్పత్తులు 35% నకిలీవే ఉంటున్నాయట.  అది కూడా ప్రముఖ బ్రాండ్‌ల పేర్లతో ఇవి చలామణి అవుతున్నట్లు తెలుస్తోంది.

రెండో స్థానంలో స్పోర్ట్స్  విభాగానికి చెందిన ప్రొడక్టులు 22 శాతం నకిలీవి  ఉన్నట్లు వెల్లడైంది. అలాగే ఆన్లైన్లో బ్యాగులు కొనుగోలు చేయాలనుకునే వారు 8శాతం మంది నకిలీ ఉత్పత్తులను తెలిసీ తెలీక కొనుగోలు చేస్తున్నట్లు తెలుస్తోంది. ఆన్లైన్ లో షాపింగ్ చేసే 70 శాతం మందికి అసలు ఉత్పత్తి ఏదో,  నకిలీ ప్రోడక్ట్ ఏదో గుర్తించగలిగే సామర్థ్యం లేనట్లు వెల్లడైంది.

ఇదిలా ఉంటే పెన్ డ్రైవ్‌లు,  మెమరీ కార్డులు కూడా విపరీతంగా నకిలీ ఉత్పత్తులు ఆన్లైన్ షాపింగ్ సైట్లలో చలామణి అవుతున్నాయి. థర్డ్-పార్టీ సెల్లర్లు  తక్కువ ధరలకు ఇలాంటి వాటిని లిస్టింగ్ చేయటం వల్ల, Amazon, Flipkart వంటి ఇ-కామర్స్ సంస్థలు కూడా అన్ని ఉత్పత్తుల నాణ్యత పట్ల తగిన జాగ్రత్తలు  తీసుకునే అవకాశం లేకపోవటం ఇలాంటి సంఘటనలు పునరావృతం అవుతున్నట్లు తెలుస్తోంది. కాబట్టి ఆన్లైన్ లో షాపింగ్ చేసేటప్పుడు చాలా జాగ్రత్తగా ఉండాలి. ముఖ్యంగా కాస్మెటిక్ విభాగానికి చెందిన ఉత్పత్తులు అటు శరీరానికీ,  ఆరోగ్యానికి హాని చేస్తాయి కాబట్టి తగినంత జాగ్రత్త తీసుకోవాలి.

చెప్పులు మహా అయితే ఎంత ఉంటాయి.. 500, 1000,  ఇంకా గొప్పగా అయితే ఓ 2 వేల లోపు! కానీ Amazon  ఏకంగా 45 వేల రూపాయల విలువ చేసే చెప్పులను తన వెబ్సైట్ ద్వారా అమ్ముతోంది. అవి కూడా ఏవో గొప్పవని ఎగ్జయిట్ అవకండి,  తరచూ ఇళ్లలో వాడే బాత్రూం చెప్పులు మాత్రమే.

కొంతమంది అమ్మకందారులు తమ ఉత్పత్తులను ఎవరు కొనకపోయినా ఫర్లేదు అనుకుని వీలైనంత ఎక్కువ ధరకు ఎలా లిస్టింగ్ చేస్తారో  దీన్ని చూస్తే అర్థమవుతుంది. Velentino అనే సంస్థ అక్షరాలా 45,393 రూపాయల ధరకి బాత్రూం చెప్పులను అమ్ముతోంది. ఈ ఆర్టికల్ రాసే సమయానికి అవి స్టాక్ లేవని  చూపిస్తోంది అనుకోండి.

ఆ ప్రోడక్ట్ రివ్యూలు చదివితే  ఖచ్చితంగా మీరు పడి పడి నవ్వుతారు. “నా బైక్  అమ్మి ఈ చెప్పులు కొన్నందుకు నేనేం బాధ పడడం లేదు.  నా గమ్యస్థానాలకు చేసుకోటానికి రోజంతా ఈ చెప్పులతో నడుస్తున్నాను.  నా బ్లడ్ ప్రెజర్ కంట్రోల్ అయింది, డయాబెటిస్ నార్మల్ అయింది, ఈ చెప్పులు కొనుగోలు చేయటం ద్వారా ఆరోగ్యంగా ఉండండి,  కావాలంటే రోజుకు 500 రూపాయలు చెల్లిస్తే వీటిని నేను అద్దెకి ఇస్తాను” అంటూ కామెడీగా ఓ రివ్యూ రాయబడితే..

మరో వ్యక్తి.. “ ఈ చెప్పులు కొనటం కోసం నా మారుతి 800 కారు అమ్మాను.  కారణం డ్రైవింగ్ కంటే వాకింగ్ మంచిది కాబట్టి, అది ఆరోగ్యానికి మంచిది కాబట్టి! ఈ చెప్పులు కొన్నందుకు సంతోషిస్తున్నాను” అంటూ రివ్యూ రాశారు.

ఇలాంటి మరిన్ని కామెడీ రివ్యూలు  చదవాలంటే ఈ లింకులో ఉన్న ఈ చెప్పుల లిస్టింగ్‌ని  మీరు స్వయంగా చూడాల్సిందే.

మీరు Amazon ద్వారా  ఏదైనా వస్తువు కొనుగోలు చేయబోతున్నారా?  డెబిట్ కార్డు ద్వారా చెల్లింపు చేయాలనుకుంటున్నారా? అయితే మీకో శుభవార్త!

Amazon  సంస్థ తాజాగా Amazon Pay EMI పేరుతో  ఒక కొత్త సదుపాయాన్ని Amazon Mobile app వాడుతున్న వినియోగదారులకు అందుబాటులోకి తీసుకొచ్చింది.  దీని ద్వారా అతి తక్కువ వడ్డీకి మీకు కావలసిన వస్తువు నేరుగా మీ డెబిట్ కార్డు నుండే EMI పద్ధతిలో కొనుగోలు చేయొచ్చు. Capital Float అనే  సంస్థ సహకారంతో Amazon ఈ ఫీచర్ ప్రవేశపెట్టింది.

దీని ద్వారా HDFC Bank, ICICI Bank, Canara Bank, Citi Bank, Kotak Mahindra Bankలకు  చెందిన డెబిట్ కార్డులు వాడేవారు 3 నుండి 12 నెలల వ్యవధి కలిగిన EMIల రూపంలో ఆ వస్తువులను కొనుగోలు చేయవచ్చు. ఇప్పటికే Amazon  సంస్థ HDFC, ICICI, Axis Bank వినియోగదారులకు డెబిట్ కార్డు ద్వారా EMI సదుపాయాన్ని అందిస్తోంది. ఇప్పుడు మరిన్ని బ్యాంకులకు దీన్ని విస్తరించింది.

ప్రస్తుతానికి Amazon Pay EMI  సదుపాయం అందరికీ లభించదు. కేవలం ఇది invite-only ఫీచర్.  ఎంపిక చేయబడిన Amazon వినియోగదారులకు లభిస్తుంది. అర్హత కలిగిన వినియోగదారులు ఈ ప్రోగ్రాం లో రిజిస్టర్ చేసుకున్న తర్వాత  వారికి గరిష్ట క్రెడిట్ లిమిట్ కేటాయించబడుతుంది. దీంట్లో రిజిస్టర్ చేసుకోవడం కోసం మన పాన్ కార్డ్, ఆధార్ కార్డు వివరాలు సమర్పించవలసి ఉంటుంది.  కన్ఫర్మేషన్ కోసం ఆధార్‌తో లింక్ చేయబడిన మొబైల్ ఫోన్ కి OTP వస్తుంది. వెరిఫికేషన్ పూర్తయిన తర్వాత గరిష్టంగా 60 వేల రూపాయల విలువ కలిగిన వస్తువులను డెబిట్ కార్డ్ EMI  పద్ధతిలో కొనుగోలు చేయవచ్చు.

అలాగే కేవలం 8,000 రూపాయల  విలువకు పైబడిన వస్తువులకు మాత్రమే ఈ EMI  సదుపాయం వర్తిస్తుంది. ఎక్సేంజ్ ఆఫర్ వాడుకునే వారికి కూడా EMI  ఇవ్వబడదు. ఓ వ్యక్తికి ఎంత క్రెడిట్ లిమిట్ ఇవ్వాలి అన్నది Capital Float  సంస్థ నిర్ణయిస్తుంది, దాంట్లో Amazon ప్రమేయం ఏ మాత్రం ఉండదు.

అవకాశమున్న ప్రతి సందర్భంలోనూ నకిలీ వార్తలు షికారు చేస్తున్నాయి.  అలాంటిదే తాజాగా మరో సంఘటన చోటు చేసుకుంది.

ఇటీవల మరణించిన మాజీ ప్రధాని అటల్ బిహారీ వాజ్‌పేయ్  చితాభస్మం, రాగి పాత్రతో Amazon Indiaలో అమ్మబడుతోంది అంటూ  ఒక స్క్రీన్ షాట్ అటు Whatsapp, Facebookలలో సర్క్యులేట్ అవుతోంది.  అది నిజమా కాదా అన్నది అసలు వెరిఫై చేసుకోకుండానే అనేకమంది దాన్ని ఇష్టమొచ్చినట్లు సోషల్ మీడియాలో తమ స్నేహితులకు పంపిస్తున్నారు.

అయితే Amazon India సైట్లో  దానికి సంబంధించిన ఇలాంటివి లిస్టింగ్ చేయబడలేదు.  ఇది కేవలం ఫొటోషాప్ ద్వారా చేయబడిన నకిలీ స్క్రీన్షాట్ మాత్రమే.  చాలామంది దాన్ని నమ్మి బిజెపిని, బిజెపి నాయకులను విమర్శించడం మొదలుపెట్టారు. కేవలం రాజకీయ ఉద్దేశాలతో మాత్రమే ఈ స్క్రీన్ షాట్ తయారుచేయబడినట్లు  తెలుస్తోంది. ఇలాంటి వాటిని నమ్మి ఇతరులకు షేర్ చేసే ముందు కనీసం ఒక రెండు నిమిషాలు వెచ్చించి అది నిజమా కాదా అన్నది నిర్ధారించుకోవడం మంచిది.

ప్రస్తుతం అందుబాటులో ఉన్న అనేక అప్లికేషన్ల ద్వారా కావలసిన విధంగా స్క్రీన్షాట్లు తయారు చేసుకోవడం,  లేదా కొద్దిపాటి ఫోటోషాప్ పరిజ్ఞానం ఉన్నవారు ఏ మాత్రం అనుమానం రాని విధంగా స్క్రీన్ షాట్ లు తయారు చేయడం పెద్ద విషయం కాదు.  ఇలాంటివి షేర్ చేస్తే మీ అజ్ఞానం బయటపడుతుంది.