whatsapp

ఇలాంటి మెసేజ్ పంపించి మీ Whatsapp హ్యాక్ చేస్తున్నారు.. జాగ్రత్తగా ఉండండి!

Whatsappని హ్యాక్ చేయడం కోసం హ్యాకర్లు అన్నిటికంటే ఒక సులువైన విధానాన్ని తాజాగా అనుసరిస్తున్నారు. ఇండియా మరియు పాకిస్తాన్ దేశాల్లో ఈ తరహా కేసులు గత కొన్ని రోజులుగా ఎక్కువగా నమోదవుతున్నాయి.

Whatsapp మొబైల్ నెంబర్ ఆధారంగా పనిచేస్తుంది అన్న విషయం తెలిసిందే. హ్యాకర్ దగ్గర మీ మొబైల్ నెంబర్ ఉండి, ఆ నెంబర్ ఆధారంగా వాట్స్అప్ ఇన్‌స్టాల్ చేసి, యాక్టివేట్ చెయ్యడానికి ప్రయత్నించినప్పుడు, మీ ఫోన్ కి వచ్చే OTP ఉంటే సరిపోతుంది, వెంటనే మీ అకౌంట్ వాళ్ళ చేతుల్లోకి వెళ్ళిపోతుంది.

దీన్ని ఆసరాగా చేసుకొని చాలా సులభంగా ఇతరుల వాట్సాప్ ఎకౌంట్లని హ్యాక్ చేస్తున్నారు. మొదట హ్యాకర్ మీ మొబైల్ నెంబర్ తెలుసుకుంటాడు. దాని సాయంతో తన దగ్గర ఉన్న ఒక ఫోన్ లో వాట్సప్‌ని యాక్టివేట్ చెయ్యడానికి పూనుకుంటాడు. సో సహజంగానే మీ ఫోన్ కి OTP వస్తుంది. వెంటనే తన దగ్గర ఉన్న రెండో ఫోన్ నుండి “తాను పొరపాటున మీకు SMS ద్వారా OTP పంపించినట్టుగా, అర్జెంట్ గా కావాలంటే వెంటనే తెలుపమని” మీ వాట్సాప్ నెంబర్‌కే మెసేజ్ పెడతాడు.

ఆ మెసేజ్ మిమ్మలను బుట్టలో పడేయడానికి అని మీరు గుర్తించకుండానే అతనికి ఓటిపి చెబితే చాలు, క్షణాల్లో మీ వాట్సాప్ ఎకౌంట్ అతని కంట్రోల్ లోకి వెళుతుంది. పై చిత్రంలోని విధంగా ఈ మధ్య కాలంలో చాలామందికి మెసేజ్లు వస్తున్నాయి. వెనుకా ముందూ ఆలోచించకుండా వారు కోరిన విధంగా OTP తెలియజేస్తున్నారు. కాబట్టి మీ సర్కిల్ లో ఉన్న మీ స్నేహితులు, బంధువులు ఈ ప్రమాదంలో పడే అవకాశం ఉంది కాబట్టి వారిని అప్రమత్తం చేయండి. ఎట్టి పరిస్థితుల్లో ఫోన్ కి వచ్చిన OTP ఇతరులతో షేర్ చేయకూడదు. అలా చేస్తే కచ్చితంగా వాట్సప్ అకౌంట్ అవతలివారి కంట్రోల్ లోకి వెళ్లిపోతుంది.

Whatsapp తాజా వెర్షన్ లో కొత్తగా ఈ సదుపాయం!

Whatsapp ఎప్పటికప్పుడు సరికొత్త సదుపాయాలను Beta వెర్షన్ వినియోగదారులకు అందిస్తూ ఉంటుంది. ఆండ్రాయిడ్ ఆపరేటింగ్ సిస్టమ్ ఆధారంగా పనిచేసే ఫోన్లను ఉపయోగించే వినియోగదారుల కోసం తాజాగా గూగుల్ ప్లే స్టోర్ లో వాట్సప్ సంస్థ విడుదల చేసిన 2.20.10 Beta వెర్షన్‌లో ఓ కీలకమైన ఫీచర్ గురించి అంతర్గతంగా ప్రస్తావించబడింది.

దాని సోర్స్ కోడ్‌ని పరిశీలించినపుడు, అందులో ప్రత్యేకంగా యానిమేటెడ్ స్టిక్కర్స్ సదుపాయం రాబోతున్నట్లు అర్థమైంది. చాలా కాలం క్రితం వాట్సాప్ తన యూజర్ల కోసం స్టిక్కర్ సపోర్ట్ తీసుకు వచ్చిన విషయం తెలిసిందే. అయితే అవి కదలకుండా ఉండే మామూలు స్టిక్కర్లు మాత్రమే. దానికి భిన్నంగా కదిలే యానిమేటెడ్ స్టిక్కర్లు రాబోతున్నాయి అన్నమాట.

ప్రస్తుతానికైతే నేరుగా యూజర్ ఇంటర్ ఫేస్ లో ఇవి ఎక్కడా కనిపించడం లేదు. ఒకసారి పూర్తిస్థాయిలో ప్రవేశపెట్టిన తర్వాత ఎలాంటి లోపాలు లేని విధంగా తయారు చేయడం కోసం వాట్సప్ ఈ సదుపాయం మీద చాలా కాలంగా అంతర్గతంగా పనిచేస్తున్నట్లు తెలుస్తోంది. అయితే తాజా వెర్షన్ కోడ్‌లో దీని గురించి ప్రత్యేకంగా ప్రస్తావించబడడం వల్ల అతి త్వరలో ఈ సదుపాయం వచ్చే అవకాశాలు కనిపిస్తున్నాయి.

ఇదిలా ఉంటే వాట్సప్ సంస్థ, ఇప్పటికీ వినియోగంలో ఉన్న స్టిక్కర్ ప్యాక్‌లకి సర్వర్ సైడ్ అప్డేట్ అందించింది. దీనికి గాను మీరు చేయవలసింది, వాట్సప్ అప్లికేషన్ ఓపెన్ చేసి అందులో చాట్ అనే మెనూలోకి వెళ్లి Stickers అనే బటన్ క్లిక్ చేసి, Update అనే ఆప్షన్ సెలెక్ట్ చేసుకోవాలి. ఇప్పటికే ఉన్న స్టిక్కర్స్ విషయంలో ప్రత్యేకంగా ఇలా అప్డేట్ చేయాల్సిన అవసరం ఏమొచ్చిందో స్పష్టమైన కారణాలు తెలియడం లేదు. ఎందుకంటే అప్డేట్ చేసిన తర్వాత కూడా పాత స్టిక్కర్స్ మాత్రమే కనిపిస్తున్నాయి. ఏదైనా బలమైన కారణం ఉంటే తప్పించి, వాట్సప్ ఈ నిర్ణయం తీసుకోకపోయి ఉండేది.

మరోవైపు వాట్సాప్ డార్క్ మోడ్ కోసం సుదీర్ఘకాలంగా వేచి చూస్తున్న వారికి త్వరలో ఆ ఫీచర్ రాబోతున్నట్లు తెలుస్తోంది.

Whatsapp విషయంలో ఫేస్బుక్ ఈ నిర్ణయాన్ని ఉపసంహరించుకుంది!

కొన్ని సంవత్సరాల క్రితం Facebook సంస్థ Whatsappని కొనుగోలు చేసిన తర్వాత, అందులో అనేక మార్పులు చేర్పులు చేసింది. ముఖ్యంగా తన ప్రోడక్టులు అయిన Facebook, Instagram, Whatsappలను ఒకదానితో మరొకటి ఇంటిగ్రేట్ చేసింది.

ఇదిలా ఉంటే మరోవైపు Whatsappలో వ్యాపార ప్రకటనలు చూపించే ప్రయత్నాలను కూడా కొంత కాలం నుండి ప్రారంభించిన విషయం టెక్నాలజీ అప్డేట్స్ ఫాలో అవుతున్న వారికి తెలిసిందే. దీనికోసం ప్రత్యేకంగా ఒక టీమ్ ను కూడా నియమించింది. Whatsappలో వ్యాపార ప్రకటనల విషయమై ఫేస్బుక్ సంస్థ తో విభేదించి, Whatsapp వ్యవస్థాపకులైన Koum, Actonలు ఆ సంస్థ నుంచి వైదొలగడం కూడా జరిగింది.

అయితే ఆశ్చర్యకరంగా వివిధ కారణాల వల్ల ఫేస్బుక్ సంస్థ, Whatsappలో వ్యాపార ప్రకటనల కోసం నిర్మించిన టీమ్‌ని తాజాగా తొలగించింది. అలాంటి ప్రయత్నాలు పూర్తిగా నిలిపివేసినట్లుగా అంతర్గత వర్గాల సమాచారం. వాస్తవానికి మీరు మీ స్నేహితులతో వాట్సాప్ లో ఛాట్ చేసేటప్పుడు, మీరు షేర్ చేసుకునే సమాచారాన్ని విశ్లేషించడం ద్వారా సంబంధిత వ్యాపార ప్రకటనలు మీకు చూపించబడే విధంగా ఇంతకాలం ప్రయత్నాలు జరిగాయి.

అయితే తాజా పరిణామాల నేపథ్యంలో వ్యక్తిగత ఛాట్‌ల విషయంలో ఇకమీదట వ్యాపార ప్రకటనలు కనిపించే అవకాశం లేదు. అయితే ఒక Whatsapp వినియోగదారుడు తన స్టేటస్ మెసేజ్ ద్వారా షేర్ చేసుకునే కంటెంట్ విషయంలో మాత్రం వ్యాపార ప్రకటనలు చూపించే అవకాశాలు స్పష్టంగా కనిపిస్తున్నాయి. ఫేస్బుక్ సంస్థ వాట్స్అప్ విషయంలో తాజాగా అనుసరిస్తున్న ప్రధాన విధానం గమనిస్తే, ప్రపంచవ్యాప్తంగా ఉన్న పెద్ద మొత్తంలో వ్యాపార సంస్థలు వాట్స్అప్ ద్వారా తమ వినియోగదారులకు సేవలందిస్తూ మరోవైపు తాము ఆదాయాన్ని ఆర్జించుకోవడంతో పాటు, ఆ సేవలందించినందుకు గాను Whatsappకి కూడా ఆర్థికంగా ఉపయోగపడే విధంగా సన్నాహాలు చేస్తోంది.

Whatsapp వాయిస్ మెసేజెస్ సరిగా పనిచేయడం లేదా? పరిష్కారం ఇది!

Whatsappలో వాయిస్ మరియు వీడియో కాల్ చేసుకోవడం అన్ని సందర్భాల్లో సాధ్యపడదు. కొన్నిసార్లు కాల్ చేసుకోవటానికి వీలు పడకపోతే వాయిస్ మెసేజ్ ల రూపంలో సంభాషణ కొనసాగించవలసి వస్తుంది.

సమస్య ఇది

కొన్నిసార్లు ఎవరైనా మీకు వాట్సాప్ ద్వారా వాయిస్ మెసేజ్ పంపించినప్పుడు, అది డౌన్లోడ్ కాదు, లేదా డౌన్లోడ్ అయినా కూడా వినిపించదు. అంతేకాదు మరికొంతమంది, వాయిస్ మెసేజ్ లు రికార్డు చేయడం సాధ్యపడటం లేదు అని కంప్లైంట్ ఇస్తూ ఉంటారు. ఇలాంటి సమస్యలు అనేక కారణాలు ఉంటాయి. అవేమిటో ఇప్పుడు చూద్దాం.

రికార్డింగ్ యాప్స్ రన్ అవుతున్నాయా?

మీరు వాట్సాప్ లో వాయిస్ మెసేజ్ రికార్డ్ చేయాలనుకున్నప్పుడు, అప్పటికే బ్యాక్ గ్రౌండ్ లో ఏదైనా స్క్రీన్ రికార్డింగ్ గానీ, కాల్ రికార్డింగ్ గానీ, లేదా వాయిస్ రికార్డర్ అప్లికేషన్ ఏదైనా బ్యాక్గ్రౌండ్లో రన్ అవుతూ ఉన్నట్లయితే కచ్చితంగా మీరు రికార్డ్ చేసే వాయిస్ మెసేజ్ ఫెయిల్ అవుతుంది. అలాంటప్పుడు తాత్కాలికంగా బ్యాక్గ్రౌండ్లో రన్ అవుతున్న ఆయా అప్లికేషన్స్‌ని నిలిపి వేసి ఆ తర్వాత వాయిస్ మెసేజ్ రికార్డ్ చేయవచ్చు.

ఇయర్‌పీస్ ఆధారంగా వాయిస్ మెసేజెస్ వినడం కోసం వాట్సాప్ మన ఫోన్ లో ఉండే ప్రాక్జిమిటీ సెన్సార్‌ని వినియోగించుకుంటూ ఉంటుంది. ఈ నేపథ్యంలో మీ ఫోన్ స్క్రీన్ మీద స్క్రీన్ ప్రొటెక్టర్ ఇబ్బందికరంగా అమర్చినట్లయితే, అది కచ్చితంగా సమస్యకు కారణం అవుతుంది. ఈ నేపథ్యంలో మీకు ఏదైనా వాట్సాప్ వాయిస్ మెసేజ్ ల విషయంలో సమస్య ఏర్పడుతున్నట్లయితే స్క్రీన్ ప్రొటెక్టర్‌ని సక్రమంగా అమర్చుకుంటే సరిపోతుంది. ముఖ్యంగా వాయిస్ మెసేజ్ లను వినేటప్పుడు తలెత్తే సమస్యల విషయంలో ఇది ఉపయోగపడుతుంది.

పర్మిషన్ సక్రమంగా లేకపోతే

సహజంగా వాయిస్ మెసేజ్ రికార్డ్ చేయాలంటే, మీ ఫోన్లో తప్పనిసరిగా మైక్రోఫోన్ పర్మిషన్ వాట్సప్ అప్లికేషన్‌కి కల్పించాల్సి ఉంటుంది. ఏ కారణం చేతైనా ఆ పర్మిషన్ సక్రమంగా ఇవ్వకపోతే అలాంటప్పుడు కూడా వాయిస్ మెసేజ్ రికార్డు చేయడం కష్టమవుతుంది. కాబట్టి సంబంధిత పర్మిషన్స్ ఛెక్ చేసి రికార్డింగ్ కి ఉపక్రమించాలి. Application Settingsలో పర్మిషన్స్ అనే విభాగంలో మైక్రో ఫోన్ పర్మిషన్ మనం గ్రాంట్ చేయొచ్చు.

కొన్నిసార్లు ఇతర సమస్యల వల్ల కూడా వాట్సాప్ వాయిస్ మెసేజ్ లు ఇబ్బంది పెడుతూ ఉంటాయి. అలాంటప్పుడు సింపుల్ గా ఫోన్ రీస్టార్ట్ చేస్తే అంతా సక్రమంగా పనిచేస్తుంది.

2020లో Whatsappలో రాబోతున్న కొత్త సదుపాయాలు ఇవి!

Whatsapp వినియోగం రోజురోజుకు బాగా పెరిగిపోతోంది. ఇప్పటికీ 2019 సంవత్సరంలో కాల్ వెయిటింగ్ సదుపాయం, ఫింగర్ ప్రింట్ లాక్ వంటి పలు కొత్త సదుపాయాలు అందుబాటులోకి తీసుకొచ్చిన వాట్సాప్ సంస్థ 2020లో మరిన్ని సదుపాయాలు తీసుకురావడానికి సన్నాహాలు చేస్తోంది. వాటికి సంబంధించిన వివరాలు ఇప్పుడు చూద్దాం.

డార్క్ మోడ్

సుదీర్ఘకాలంగా వాట్సప్ వినియోగదారులకు ఊరిస్తూ వస్తున్న సదుపాయం ఇది. అనివార్య కారణాల వల్ల ఈ సదుపాయం చాలా కాలంగా వాయిదా పడుతూ వస్తోంది. ఆండ్రాయిడ్ 10 ఆపరేటింగ్ సిస్టం లో సిస్టమ్ వైడ్ డార్క్ మోడ్ వచ్చిన నేపథ్యంలో 2020 ప్రారంభంలోనే Whatspp Dark Mode అందుబాటులోకి వచ్చే అవకాశాలు కనిపిస్తున్నాయి. ఇటీవలి కాలంలో ఆమోల్డ్ డిస్ప్లే లు కలిగిన స్మార్ట్ఫోన్లు మార్కెట్లో లభిస్తున్న కారణంగా, డార్క్ మోడ్ ఎనేబుల్ చేసుకుంటే చాలావరకు బ్యాటరీని ఆదా చేసుకోవచ్చు.

వాటంతట అవే తొలగిపోయే మెసేజ్లు

ఒక మెసేజ్ ఎవరికైనా పంపించిన తర్వాత మనం సెట్ చేసిన సమయం తరువాత అది ఆటోమేటిగ్గా డిలీట్ అయ్యేవిధంగా self destructing messages సదుపాయం కూడా 2020లో రాబోతోంది. ఇప్పటికే వాట్సాప్ గ్రూప్‌లో సభ్యులు పోస్ట్ చేసిన మెసేజ్ లు కొంత సమయం తర్వాత ఆటోమేటిగ్గా డిలీట్ అయ్యేవిధంగా అడ్మిన్ ఏర్పాటు చేసే సదుపాయం చూఛాయగా ప్రవేశపెట్టబడింది. ఇది ఇద్దరు వ్యక్తులు జరుపుకునే పర్సనల్ కన్వర్‌జేషన్ విషయంలో కూడా రాబోతోంది.

వ్యాపార ప్రకటనలు

2019లో నెదర్లాండ్స్ లో జరిగిన ఫేస్బుక్ మార్కెటింగ్ సమ్మిట్‌లో ఫేస్బుక్ సంస్థ, వాట్సాప్ లో వ్యాపార ప్రకటనలు ఎలా చూపించబోతోంది ఒక డెమో చేయడం జరిగింది. వాట్సాప్ స్టేటస్ పోస్టులలో 2020 నుండి ఫుల్ స్కిన్ ప్రమోషన్స్ కనిపించబోతున్నాయి. కేవలం ప్రకటనలు మాత్రమే కాదు, ఒకవేళ వినియోగదారులు ఆయా ప్రకటనలో కనిపించే వస్తువులను కొనుగోలు చేయాలనుకుంటే, అక్కడికక్కడే వాట్సప్ పేమెంట్ సదుపాయం ద్వారా సంబంధిత సంస్థకు చెల్లింపులు చేసి ఆయా వస్తువులను డెలివరీ తీసుకోవచ్చు.

రివర్స్ ఇమేజ్ సెర్చ్

వాట్సాప్ లో ఫేక్ న్యూస్ ఎక్కువవుతున్న నేపథ్యంలో, దానికి అడ్డుకట్ట వేయడం కోసం Reverse Image searchని వాట్స్అప్ ప్రవేశపెట్టే యోచనలో ఉంది. మీకు ఇక మీదట ఎవరైనా వాట్సాప్ ద్వారా ఏదైనా ఇమేజ్ పంపిస్తే, దానిని అప్పటికప్పుడు గూగుల్లో వెతికి పట్టుకొని అది నిజమా కాదా అన్నది వెరిఫై చేసుకోవచ్చు.

వీటన్నిటితోపాటు ఫిబ్రవరి 1, 2020 నుండి కొన్ని ఎంపిక చేయబడిన పాత ఫోన్లకి Whatsapp పనిచేయదు. ఆండ్రాయిడ్ 2.3.7, మరియు iOS 8 కంటే ముందు వెర్షన్స్ వాడుతున్న ఫోన్లలో వాట్సాప్ పని చేయదు.