గత కొద్దిరోజులుగా వాట్సప్ గోల్డ్ వైరస్ వాట్సాప్ యూసర్ లను టార్గెట్ చేస్తోంది. అనేకమంది తెలిసీ తెలియక దాని బారిన పడుతున్నారు.
దాని గురించి వివరంగా తెలుసుకునే ముందు, దాని నేపథ్యం చూద్దాం. కొంతకాలం క్రితం దేశవ్యాప్తంగా వాట్సప్ ఆధారంగా పుకార్లు చెలరేగిపోవడంతో తగిన చర్యలు తీసుకోమని కేంద్ర ప్రభుత్వం వాట్సప్ సంస్థను ఆదేశించడంతో, వాట్సప్ ఒక కొత్త మార్పు తీసుకువచ్చింది. అదే గరిష్టంగా కేవలం ఐదు మందికి మాత్రమే ఒక మెసేజ్ ఫార్వర్డ్ చేసే పరిమితి విధించడం!
వాట్సప్ గోల్డ్ అంటే..?
దీన్ని ఆసరాగా చేసుకుని తాజాగా వాట్సాప్ గోల్డ్ వైరస్ సర్క్యులేట్ అవుతోంది. వాట్సప్ గోల్డ్ పేరిట ఒక ప్రత్యేకమైన అప్డేట్ ఉందని, దాంట్లో మెసేజ్ ఫార్వార్డ్ విషయంలో ఎలాంటి పరిమితులు ఉండవని, కావాల్సినంత మందికి మీ మెసేజ్ లు ఫార్వర్డ్ చేసుకోవచ్చు అంటూ, అలాగే అనేక కొత్త సదుపాయాలు కూడా ఆ ప్రత్యేకమైన వాట్సప్ గోల్డ్ వెర్షన్లో లభిస్తాయని ఆ మెసేజ్ సారాంశం. ఆ మెసేజ్ తో పాటు ఒక లింకు కూడా షేర్ చేయబడుతోంది. చాలా మంది వినియోగదారులు వెనకా ముందు ఆలోచించకుండా ఆ లింకు క్లిక్ చేసి, డౌన్లోడ్ చేసుకోవడానికి ప్రయత్నిస్తున్నారు.
వాస్తవానికి అలా క్లిక్ చేసినప్పుడు, మీ చేజేతులా మీ ఫోన్లోకి మాల్వేర్ డౌన్లోడ్ చేసుకుంటున్నట్లు భావించాలి. వాట్సప్ కోసం వాట్సాప్ బిజినెస్, మామూలు వాట్సాప్, వాట్సప్ బీటా వెర్షన్లు తప్పించి అధికారికంగా ఎలాంటి వెర్షన్లు లేవు. కాబట్టి మీకు ఎవరైనా ఇలా వాట్సప్ గోల్డ్ పేరిట ఏదైనా మెసేజ్ పంపిస్తే, నిర్మొహమాటంగా దాన్ని డిలీట్ చేయండి. దాన్ని నమ్మి ఇతరులకు ఫార్వార్డ్ చేయడం అసలు మంచిదే కాదు. వాట్సప్ గోల్డ్ వెర్షన్ పేరిట కొన్నేళ్ల క్రితం ఇలాంటివే పుకార్లు సర్క్యులేట్ అయ్యాయి. కొద్దికాలం తర్వాత మళ్లీ అవి ఇప్పుడు మొదలయ్యాయి.
మరో పుకారు
దీంతో పాటు మరో పుకారు చలామణిలో ఉంది. దాని సారాంశం ఇది..
“ మీకు తెలిసిన వాళ్ళు ఎవరైనా వాట్సప్ వాడుతుంటే ఈ మెసేజ్ ఫార్వర్డ్ చేయండి. Martinelli పేరుతో వాట్సాప్ నుండి ఏదైనా వీడియో వస్తే అసలు దాన్ని ఓపెన్ చేయకండి, దాని ఓపెన్ చేస్తే మీ ఫోన్ హ్యాక్ అవుతుంది, ఏ పద్ధతిలోనూ తిరిగి మీ ఫోన్ మీ కంట్రోల్ లోకి రాదు” అంటూ ఫేక్ మెసేజ్ సర్క్యులేట్ అవుతోంది. ఇది కూడా పూర్తిగా అబద్ధం. ఇలాంటి వాటిని అసలు నమ్మకండి.
